չորեքշաբթի, 14 նոյեմբերի 2001
Նոյեմբերի 14-ին տեղի ունեցավ ՀՀ կառավարության մարդասիրական օգնության կենտրոնական հանձնաժողովի հերթական նիստը, որը վարում էր հանձնաժողովի նախագահ Վ.Մովսիսյանը:
Հանձնաժողովը քննարկեց 2001-2003 թվականների ընթացքում իրականացվող 4 երկարաժամկետ բարեգործական ծրագիր:
Գիտության և առաջատար տեխնոլոգիաների ազգային հիմնադրամը հանձնաժողովի քննարկմանն էր ներկայացրել «Հայաստանի Հանրապետությունում գիտական ենթակառուցվածքների և հիմնարար գիտությունների զարգացում» ծրագիրը: Ծրագիրը նպատակ ունի աջակցել հանրապետության գիտական համակարգի տեխնիկական զարգացմանն ու վերազինմանը, նպաստել գիտության համակարգում երիտասարդ կադրերի ներգրավմանը և կանխել հանրապետությունից մտավոր ներուժի արտահոսքը: Այս խնդիրներն իրականացնելու նպատակով դրամաշնորհներ կտրամադրվեն հատկապես բնական, ճշգրիտ և տեխնիկական գիտությունների ու գիտական համակարգի ինտերնետային ցանցի կատարելագործման բնագավառներում:
Շարունակելով տարիների ընթացքում ձևավորված բարի ավանդույթները` «Մեծն Ներսես» բարեգործական հասարակական կազմակերպությունը 2001-2003 թվականների ընթացքում կիրականացնի արցախյան պատերազմում զոհված ազատամարտիկների անչափահաս երեխաներին և ծնողներին օժանդակության ծրագիրը: Լեռնային Ղարաբաղի Հանրապետության և Հայաստանի շուրջ 700 երեխաներ և 120 զոհվածի ծնողներ կշարունակեն ստանալ ամենամսյա դրամական օգնություն: Կազմակերպությունը կհովանավորի նաև զոհված ազատամարտիկների բարձրագույն ուսումնական հաստատություններում սովորող երեխաներին:
«ՕՔՍՖԱՄ» բրիտանական կազմակերպության հայաստանյան մասնաճյուղը կվերանորոգի Սյունիքի մարզի Դավիթ Բեկ, Հարթաշեն, Խալանվար, Բարգավան, Ճակատեն, Սրաշեն և Ներքին Հանդ գյուղերի բուժկետերը, կաջակցի բնակչության առողջության առաջնային պահպանմանը: Սյունիքի և Վայոց ձորի մարզերի 58 սահմանամերձ և հեռավոր գյուղերի բնակչության անհետաձգելի բուժօգնության կազմակերպման համար կազմակերպությունը կտրամադրի շուրջ 12 մլն դրամի դեղորայք:
Հանձնաժողովը քննարկեց և հաստատեց Բաց հասարակության ինստիտուտի օժանդակության հիմնադրամի հայկական մասնաճյուղի ֆինանսավորմամբ Գիտությունների ազգային ակադեմիայի կողմից իրականացվող «Հայ ճարտարապետության պատմության» և Հովսեփ Օրբելու «Ընտիր երկերի» հրատարակման ծրագիրը:
Նիստում քննարկվեցին նաև առանձին բարեգործական ու հասարակական կազմակերպությունների հասցեով ուղարկված բարեգործական բեռների ներմուծման ու բաշխման, ինչպես նաև նախկինում հաստատված ծրագրերի իրականացման հետ անմիջականորեն կապված ու դրանց համար զգալի նշանակություն ունեցող գործարքների և այլ հարցեր:
