երեքշաբթի, 5 հունիսի 2007
ՀՀ վարչապետ Սերժ Սարգսյանն այսօր ընդունել է պաշտոնական այցով Երևան ժամանած ԵԱՀԿ գործող նախագահ, Իսպանիայի Թագավորության արտաքին գործերի նախարար Միգել Անխել Մորատինոսին և նրա գլխավորած պատվիրակությանը, որի կազմում է նաև ԵԱՀԿ Խորհրդարանական վեհաժողովի նախագահ Գորան Լենմարկերը:
Ողջունելով պարոն Միգել Անխել Մորատինոսի այցը Հայաստան՝ վարչապետը հույս է հայտնել, որ այն կնպաստի ոչ միայն ԵԱՀԿ-ի հետ մեր երկրի համագործակցության առավել խորացմանը, այլև հայ-իսպանական երկկողմ հարաբերությունների հետագա զարգացմանը:
ԵԱՀԿ գործող նախագահ, Իսպանիայի Թագավորության արտգործնախարարը ևս կարևորելով այդ համագործակցությունը, նշել է, որ Իսպանիան և Հայաստանն արդեն ժամանակն է, որ հայտարարեն քաղաքական, տնտեսական, մշակութային ու այլ ոլորտներում նոր որակի հարաբերություններ հաստատելու և ամրապնդելու մասին: Նա նշել է, որ Իսպանիան պատրաստվում է Հայաստանում բացել դեսպանատուն, ինչը ևս զգալիորեն կնպաստի երկկողմ հարաբերությունների սերտացմանը:
ՀՀ վարչապետի հետ հանդիպման ժամանակ, ներկայացնելով իր երկրի տնտեսական հնարավորությունները և նշելով, որ բավականին տպավորված է Հայաստանի տնտեսական ցուցանիշներով ու տնտեսության դինամիկ աճով, Միգել Անխել Մորատինոսն ասել է, թե աշխարհում ամենախոշոր ներդրողներից մեկը համարվող Իսպանիան Հայաստանում ևս կարող է ամենատարբեր ոլորտներում զգալի ներդրումներ կատարել:
Նա ընդգծել է, որ իբրև ԵԱՀԿ գործող նախագահ ևս, այս այցը էական է, նկատի առնելով, որ այնպիսի զգայուն հարցերում, ինչպիսին է ԼՂ հակամարտության կարգավորման բանակցային գործընթացը, սպասվում են կարևոր որոշումներ, և ԵԱՀԿ-ի առաքելությունն է այդ բանակցություններում ներգրավված ճիշտ որոշում կայացնող անձանց խրախուսելն ու հայ և ադրբեջանական ժողովուրդների համար դրական միջավայր ստեղծելը:
Մինչ ԼՂ հակամարտության կարգավորման գործընթացի վերաբերյալ ՀՀ վարչապետի հետ ավելի մանրամասն զրուցելը, ԵԱՀԿ գործող նախագահը նախ շնորհավորել է նրան՝ Հայաստանի Հանրապետությունում ընտրությունների հաջող անցկացման կապակցությամբ, շեշտելով, որ ԵԱՀԿ դիտորդական առաքելության բարձր որակավորում ունեցող մասնագետները շատ դրական ու գերազանց գնահատականներ են տվել ընտրություններին: Նա նշել է, որ ըստ այդմ, լավ հիմք է ստեղծված ՀՀ նախագահական ընտրություններից առաջ այդ փորձն օգտագործելու, նաև՝ որոշակի բարելավումների ուղղությամբ աշխատանք տանելու համար: Միգել Անխել Մորատինոսը հավաստիացրել է, որ ԵԱՀԿ-ն պատրաստակամ է այդ ժամանակ ևս հնարավորինս աջակցելու բարձր մակարդակով և եվրոպական չափանիշներին համապատասխան ընտրություններ անցկացնելու համար:
Շնորհակալություն հայտնելով հնչած գնահատականների և շնորհավորանքի համար, ՀՀ վարչապետն ասել է, որ ՀՀ խորհրդարանական ընտրությունները հետագա ընտրությունների համար որոշակի չափանիշ լինելով հանդերձ, դեռևս կատարելագործման կարիք ունեն, որպեսզի համարվեն ամբողջությամբ միջազգային չափանիշներին համապատասխան: Նա հույս է հայտնել, որ մինչ այդ իրականացվելիք աշխատանքի արդյունքում, 2008թ. ՀՀ քաղաքական բոլոր ուժերին կհաջողվի անցկացնել ավելի լավ ընտրություններ, քան 2007թ. էր:
Անդրադառնալով ԼՂ հակամարտության կարգավորման հարցին, Սերժ Սարգսյանը վերահաստատել է հայկական կողմի մոտեցումը՝ հակամարտությունը փոխզիջման և խաղաղ ճանապարհով լուծելու վերաբերյալ: Վարչապետը միաժամանակ նկատել է, թե Ադրբեջանի նախագահի հայտարարությունները լսելիս առանձնապես լավատեսությամբ չի համակվում, այդուհանդերձ, հույս ունի, որ առաջիկայում երկու երկրների նախագահների սանկտ-պետերբուրգյան հանդիպումն արդյունավետ կլինի: ԵԱՀԿ գործող նախագահը ևս լավատեություն է հայտնել, հուսալով, որ այդպիսով քաղաքական հիմք կդրվի հետագա բանակացությունների համար:
Զրույցի ընթացքում ՀՀ վարչապետ Սերժ Սարգսյանը բարձր է գնահատել ԵԱՀԿ երևանյան գրասենյակի հետ համագործակցությունը ևս, որի հետ, ըստ նրա, արդեն իսկ գործակցության ավանդույթ է ձևավորվել: Նշելով, որ ներկայումս գրասենյակի կողմից երեք ծրագիր է իրականացվում Հայաստանում, որոնք կարևոր նշանակություն ունեն համապատասխան ոլորտների զարգացման համար, նա հավաստել է ՀՀ կառավարության պատրաստակամությունը՝ այսուհետ ևս այն շարունակելու և զարգացնելու: Վարչապետը հատկապես ընդգծել է Մելանժի ծրագիրը:
Հանդիպման ավարտին ԵԱՀԿ գործող նախագահ, Իսպանիայի արտգործնախարարը մի շարք հարցերում, այդ թվում՝ ընտրությունների վերաբերյալ, ՀՀ վարչապետի տեսակետները լսելով, նշել է, թե այդ ամենը վկայում է ժողովրդավարության ամրապնդման ուղղությամբ աշխատանքը շարունակելու պատրաստակամության մասին, նկատելով, որ ժողովրդավարությունը մի գործընթաց է, որն անընդհատ անհրաժեշտ է ամրապնդել:
