չորեքշաբթի, 13 հունիսի 2007
ՀՀ վարչապետ Սերժ Սարգսյանն այսօր ընդունել է ՀՀ-ում Իրանի Իսլամական Հանրապետության արտակարգ և լիազոր դեսպան Ալիռեզա Հաղիղյանին:
Վարչապետը գոհունակությամբ է նշել, որ բարեհաջող իրագործվում են այն բոլոր ծրագրերը, որոնց շուրջ երկու երկրների միջև բարձր մակարդակով պայմանավորվածություն է ձեռք բերվել: Նա հույս է հայտնել, որ ս.թ. հուլիսին կայանալիք Հայ-իրանական միջկառավարական հանձնաժողովի նիստը լրացուցիչ խթան կհանդիսանա տնտեսական հարաբերությունների զարգացման և ամրապնդման համար:
Դեսպան Ալիռեզա Հաղիղյանը ՀՀ վարչապետին է փոխանցել ԻԻՀ փոխնախագահի ջերմ ոջույնները, վարչապետի պաշտոնում նշանակման կապակցությամբ՝ նրա շնորհավորանքը և ՀՀ նոր կառավարությանը, նրա ղեկավարին ու ամբողջ հայ ժողովրդին ուղղված բարեմաղթանքը:
Դեսպանը ևս կարևորել է միջկառավարական հանձնաժողովի նիստը, նշելով, որ հանձնաժողովի իրանական կողմը լրջորեն նախապատրաստվում է այդ նիստին: Նա առաջիկա ծրագրերից ու անելիքներից առանձնացրել է Հայաստանի և Իրանի միջև ազատ առևտրի ռեժիմի վերաբերյալ համաձայնագրի ստորագրումը, նավթաքիմիայի բնագավառում համագործակցությունը, Արաքս գետի վրա ՀԷԿ-ի կառուցման աշխատանքները, նշելով, որ ՀԷԿ-ի արտադրած էլեկտրաէներգիան մեծապես կնպաստի սահմանամերձ շրջանների զարգացմանը, իսկ լրացուցիչ խմբաքանակը կօգտագործվի Իրանի հետ էլեկտրականության փոխանակման համար: Դեսպան Ալիռեզա Հաղիղյանն ասել է նաև, որ նախատեսվում է ստեղծել համատեղ հանձնախումբ՝ երկկողմ ներդրումները խթանելու նպատակով: ԻԻՀ դեսպանը տեղեկացրել է, որ ս.թ հուլիսին Թեհրանում կայանալու է միջազգային խոշոր գիտաժողով՝ նվիրված տարանցիկ ուղիներին, որտեղ կքննարկվի նաև «Հյուսիս-Հարավ» միջանցքի կարևորության խնդիրը: Ալիռեզա Հաղիղյանը նշել է, որ ՀՀ տրանսպորտի և կապի նախարարի անունով գիտաժողովին մասնակցության հրավեր է ուղարկվել, և Հայաստանի մասնակցությունն այդ միջոցառմանը ցանկալի կլինի:
Հանդիպման ընթացքում, դեսպանի խնդրանքով, ՀՀ վարչապետը ներկայացրել է նաև ԼՂ հակամարտության կարգավորմանն ուղղված բանակցությունների վերջին զարգացումները:
