հինգշաբթի, 21 հունիսի 2007
ՀՀ վարչապետ Սերժ Սարգսյանն այսօր ընդունել է ՀՀ-ում Գերմանիայի Դաշնային Հանրապետության արտակարգ և լիազոր դեսպան Հայկե Փայչին, որն ավարտում է իր դիվանագիտական առաքելությունը մեր երկրում:
Վարչապետը բարձր է գնահատել անցած երեք տարիներին հայ-գերմանական հարաբերությունների ամրապնդմանն ուղղված տիկին Փայչի գործունեությունը, նշելով, որ այդ հարաբերությունները նշված ժամանակահատվածում բարձրացվել են որակական նոր մակարդակի՝ ընդգրկելով բոլոր բնագավառները, ներառյալ՝ տնտեսությունն ու անվտանգությունը:
Գերմանիայի դեսպանը շնորհակալություն է հայտնել ՀՀ վարչապետին և կառավարությանը՝ շահագրգիռ աջակցության և համագործակցության համար: Երկկողմ հարաբերությունների սերտացումից բացի, ըստ դեսպանի, Գերմանիան մեծ դերակատարում է ունեցել ՀՀ-ԵՄ հարաբերությունների զարգացման, մասնավորապես, Եվրոպական հարևանության քաղաքականության ծրագրում Հայաստանը ներգրավելու, այնուհետ նաև 2006թ. նոյեմբերին ԵՄ-Հայաստան գործողությունների ծրագրի ընդունմանը նպաստելու գործում: Իբրև ԵՄ խոշորագույն դոնոր երկրներից մեկը, դեսպան Փայչի հավաստմամբ, իր երկիրը կարող է նաև նշանակալից ավանդ ունենալ այդ ծրագրի իրականացման փուլում:
Զրույցի ընթացքում երկուստեք կարևորվել է ս.թ. սեպտեմբերի 10-14-ին տեղի ունենալիք Հայ-գերմանական միջկառավարական հանձնաժողովի նիստը: ԳԴՀ դեսպանը համագործակցության առումով Հայաստանը համարել է օրինակելի և համոզվածություն հայտնել, որ իր հաջորդի օրոք այդ գործակցությունն էլ ավելի կընդլայնվի ու կզարգանա:
Հանդիպման ավարտին վարչապետը հաջողություն է մաղթել տիկին Հայկե Փայչին հետագա գործունեության մեջ:
