չորեքշաբթի, 29 օգոստոսի 2007
ՀՀ վարչապետ Սերժ Սարգսյանն այսօր ընդունել է Լիբանանյան հեղինակավոր «ԿրեդիտԲանկ»-ի տնօրենների խորհրդի նախագահ Տարեկ Խալիֆային և նրա գլխավորած պատվիրակությանը: Վարչապետը ողջունել է Հայաստանում գործունեություն ծավալելու «ԿրեդիտԲանկ»-ի մտադրությունը, նշելով, որ այն միանգամայն համահունչ է Հայաստանի ֆինանսական շուկայի զարգացման` ՀՀ կառավարության քաղաքականությանը: Ըստ վարչապետի, բանկի փորձը մեր երկրի համար կարող է նաև բավականին օգտակար լինել, նկատի առնելով, որ Լիբանանը մշտապես համարվել է ֆինանսական կենտրոն և լուրջ առաջընթաց է ունեցել ֆինանսական շուկայի զարգացման գործում:
«ԿրեդիտԲանկ»-ի տնօրենների խորհրդի նախագահ Տարեկ Խալիֆան շնորհակալություն է հայտնել համագործակցության պատրաստակամության համար, նշելով, որ ՀՀ ԿԲ-ի և հայաստանյան մի շարք բանկերի գործընկերների հետ մինչ այս տեղի ունեցած հանդիպում-քննարկումներն ավելի են ամրապնդել Հայաստանում գործունեություն ծավալելու «ԿրեդիտԲանկ»-ի նպատակադրվածությունը, քանի որ իրենց դիտարկումներով` Հայաստանում զարգացման լուրջ հեռանկար ու բարենպաստ միջավայր կա, և բանկն ուրախ կլինի իր ներդրումն ունենալու Հայաստանի տնտեսության զարգացման գործում: «ԿրեդիտԲանկ»-ի տնօրենների խորհրդի նախագահը կարևորել է ՀՀ կառավարության հետ համագործակցությունը նաև որոշակի ներդրումային ծրագրերում, որոնք ներառում են գյուղատնտեսությունը, ենթակառուցվածքների զարգացումը, արդյունաբերությունը:
Հայաստանյան շուկայում լիբանանյան կապիտալի ներգրավման գործում երկուստեք կարևորվել է լիբանանահայ համայնքի դերը ևս: «ԿրեդիտԲանկ»-ի տնօրենների խորհրդի նախագահի գլխավորած պատվիրակության մեջ լիբանանահայ համայնքի հեղինակավոր ներկայացուցիչների ներկայությունը և հայ-լիբանանյան հարաբերությունների ու համագործակցության զարգացմանն ուղղված նրանց մշտական ջանքերը համարվել է ասվածի վկայություններից մեկը:
Հանդիպման ավարտին Սերժ Սարգսյանը հաջողություններ է մաղթել «ԿրեդիտԲանկ»-ին` մեր երկրում իր ծրագրերն իրականացնելու ճանապարհին և վստահեցրել, որ ՀՀ կառավարությունն իր իրավասությունների և հնարավորությունների սահմաններում կաջակցի ու կնպաստի մեր տնտեսության ու նաև բանկի համար շահավետ և հեռանկարային բոլոր ծրագրերի իրագործմանը:
