չորեքշաբթի, 12 սեպտեմբերի 2007
ՀՀ վարչապետ Սերժ Սարգսյանը ցավակցություն է հայտնել Ֆուտբոլի Հայաստանի հավաքականի գլխավոր մարզիչ Յան Պորտերֆիլդի մահվան կապակցությամբ: Վարչապետի ցավակցական խոսքում, մասնավորապես, ասված է.
«Ցավով տեղեկացա ֆուտբոլի Հայաստանի ազգային հավաքականի գլխավոր մարզիչ Յան Պորտերֆիլդի անժամանակ մահվան մասին:
Իր գործունեության շատ կարճ ժամանակահատվածում նա կարողացավ նոր շունչ հաղորդել Հայաստանի ազգային հավաքականին, դառնալ համախմբող ու վճռականություն հաղորդող այն կենտրոնը, որն առաջ տարավ թիմային ոգին ու հաղթանակի գաղափարը: Իսկ այդ գործունեության արդյունքներն արտահայտվեցին ոչ միայն մարզադաշտերի լուսատախտակներին, այլև հարյուր հազարավոր ֆուտբոլասերների ոգևորության ու մեր բոլորի հավատի տեսքով:
Խորապես վշտացած եմ եղելությամբ: Ցավակցում եմ Յան Պորտերֆիլդի ընտանիքի անդամներին, հարազատներին, նրա սաներին ու ողջ ֆուտբոլասեր հայ հասարակությանը»:
