ուրբաթ, 21 սեպտեմբերի 2007
ՀՀ վարչապետ Սերժ Սարգսյանն այսօր ընդունել է ԱՄՆ Միացյալ հայկական հիմնադրամի ղեկավարությանը` հիմնադրամի նախագահ Հարութ Սասունյանի գլխավորությամբ: Ընդունելությանը մասնակցել են նաև Հայաստանում ԱՄՆ դեսպանության գործերի ժամանակավոր հավատարմատար Ռուդոլֆ Փերինան, ՀՀ առողջապահության նախարար Հարություն Քուշկյանը:
Վարչապետը շնորհավորել է ընդունելության բոլոր մասնակիցներին Հայաստանի անկախության 16-րդ տարեդարձի կապակցությամբ, ընդգծելով, որ նրանք և այն բոլոր բարեգործական կազմակերպությունները, որ նրանք ներկայացնում են հսկայական ավանդ ունեն մեր պետության կայացման գործում: Ըստ վարչապետի, խնդիրը միայն այն չէ, որ այդ կազմակերպությունները սատար են կանգնում Հայաստանին և Լեռնային Ղարաբաղին` կենսական նշանակություն ունեցող ծրագրերի իրականացման հարցերում, օգնում կարիքավորներին, սոցիալապես խոցելի խավերին, այլև այն, որ օրինակ են ծառայում բոլոր կայացած մարդկանց համար` օգնելու այլոց և հայրենի պետությանը: «Ուրախ եմ, որ ձեր լավ օրինակն արդեն սաղմեր է ձգում Հայաստանում», ասել է Սերժ Սարգսյանը:
Ընդգծելով, որ բարեգործությունը, անշուշտ, նաև թվերով է հաշվվում և Միացյալ հայկական հիմնադրամի կողմից Հայաստանում իրականացված բարեգործական նախաձեռնությունների ընդհանուր ծավալն արդեն հատում է 500 մլն ԱՄՆ դոլարի սահմանը, վարչապետը նշել է, որ այդ ամենի իրական արժեքը, անկասկած, շատ ավելի մեծ է և շնորհակալություն է հայտնել բոլորին` իրենց հայրենանվեր գործունեության համար:
Շնորհակալություն հայտնելով ջերմ ընդունելության համար, Միացյալ հայկական հիմնադրամի նախագահ Հարութ Սասունյանը երախտագիտություն է հայտնել ամերիկայի բոլոր հայկական բարեգործական կազմակերպությունների ղեկավարներին ու ներկայացուցիչներին, Հայաստանի պետական ու ոչ պետական կազմակերպություններին և անհատներին` իրենց ծրագրերն ու նախաձեռնություններն իրականացնելու համար, ընդգծելով, որ առանց այդ ներդաշնակ աշխատանքի հաջողության հասնելն անհնար կլիներ:
