երկուշաբթի, 4 փետրվարի 2002
Այսօր տեղի ունեցավ Զարգացման հայկական գործակալության խորհրդի նիստ, որը վարեց ՀՀ վարչապետ, ԶՀԳ խորհրդի նախագահ Անդրանիկ Մարգարյանը: Քննարկվեցին նախորդ նիստի հանձնարարականների կատարման ընթացքը, ԶՀԳ-ի 2002 թ. աշխատանքային ծրագրի նախագիծը և ընթացիկ այլ հարցեր:
Ըստ ԶՀԳ գործադիր տնօրեն Վահագն Մովսիսյանի, ի կատարումն նախորդ նիստի հանձնարարականի, բանակցություններ են ընթանում Համառուսաստանյան ցուցահանդեսային կենտրոնի հետ՝ Մոսկվայում մշտական գործող ցուցահանդեսային տաղավարում հայկական ապրանքների մշտական գործող ցուցահանդես-վաճառք կազմակերպելու նպատակով համապատասխան միջոցառումների ծրագիր մշակելու համար: Տեղեկատվական տեխնոլոգիաների գծով այս տարվա աշնանը Երևանում կայանալիք ցուցահանդեսի կազմակերպման հանձնարարականի կապակցությամբ նշվեց, որ ներկայումս կազմվում է ԱՊՀ երկրներում 2002թ. անցկացվելիք ճյուղային-մասնագիտացված ցուցահանդեսների ընդհանուր ցանկը, որը ԱՊՀ գործադիր կոմիտեի կողմից կուղարկվի ՀՀ կառավարության համաձայնեցմանը: Ըստ Վ. Մովսիսյանի, ցանկում կհստակեցվեն ցուցահանդեսների անցկացման ժամկետներն ու մեխանիզմները, մասնակիցները, ինչպես նաև ֆինանսավորման աղբյուրները:
Նախորդ նիստի հանձնարարականներից էր նաև ԶՀԳ-ի 2002թ. աշխատանքային ծրագրի լրամշակված տարբերակի ներկայացումը, որն այսօր դրվեց ԶՀԳ խորհրդի հաստատմանը:
Ծրագրով նախատեսվում են ՀՀ ներդրումային միջավայրը ներկայացնող տեղեկատվական նյութերի մշակում և տպագրում, Հայաստանում և արտերկրում մասնագիտացված գործարար համաժողովների և սեմինարների կազմակերպում, Հայաստանի՝ որպես բարենպաստ ներդրումային միջավայր ունեցող երկրի վարկանիշի ձևավորում, պոտենցիալ ներդրողների վերաբերյալ տեղեկատվության գնահատում, աջակցություն Հայաստանում և ԼՂՀ-ում գործարարությանն օժանդակող կառույցների կազմավորմանը, ՀՀ կառավարության պատվերով՝ ձեռնարկությունների գործարար ծրագրերի փորձաքննություն և առաջմղում, Հայաստանի Հանրապետության և ԱՊՀ անդամ երկրների միջև երկարաժամկետ տնտեսական միջպետական համագործակցություն, արտահանման նպատակով առաջարկվող հայաստանյան արտադրության ապրանքների վերաբերյալ տեղեկատվական միասնական բանկի ստեղծում և այլ միջոցառումներ:
Քննարկումից հետո, արված դիտողություններն ու առաջարկությունները հաշվի առնելով, խորհուրդը հավանություն տվեց ԶՀԳ 2002 թ. աշխատանքային ծրագրին:
Այսօրվա նիստում խորհուրդը որոշեց ԶՀԳ փակ բաժնետիրական ընկերության կառուցվածքում ձևավորել ինֆորմացիոն տեխնոլոգիաների բաժին, որի համար լրացում կկատարվի ՀՀ վարչապետի 2001 թ. ապրիլի 5-ի N260 որոշման մեջ: Խորհրդի մեկ այլ որոշմամբ ստեղծվեց «Փոքր և միջին ձեռնարկատիրության զարգացման» հիմնադրամ:
Նիստում լսվեց նաև «Ինֆորմացիոն տեխնոլոգիաների հիմնադրամ» հասարակական կազմակերպության տնօրեն Գ.Չուգասզյանի զեկուցումը՝ Երևանում այս տարվա ապրիլին կայանալիք ինֆորմացիոն տեխնոլոգիաների տարածաշրջանային կոնֆերանսի նախապատրաստական աշխատանքների վերաբերյալ:
