երեքշաբթի, 5 մարտի 2002
«Երկու բարեկամ երկրների՝ Հայաստանի և Իրանի ռազմաքաղաքական համագործակցության ուղղությամբ ձեռք բերված պայմանավորվածությունների նկատմամբ հետևողականության վկայությունը համարվող այս այցը կնպաստի նաև տնտեսության բնագավառում համատեղ ծրագրերը գործնական ակտիվ հարթություն տեղափոխելուն»,- Իրանի Իսլամական Հանրապետության պաշտպանության նախարար Ալի Շամխանիի և նրա գլխավորած պատվիրակության հետ հանդիպմանը նշել է ՀՀ վարչապետ Անդրանիկ Մարգարյանը: Այս տեսանկյունից երկուստեք կարևորվել է առաջիկայում Իրան-Հայաստան գազամուղի և Քաջարանի թունելի շինարարության ուղղությամբ ակտիվ գործունեության ծավալումը:
Հանդիպման ընթացքում անդրադարձ է եղել տարածաշրջանի երկրների միջև համագործակցության ընդլայնման անհրաժեշտությանը, անվատանգության խնդիրներին: Վարչապետ Անդրանիկ Մարգարյանը նշել է, որ Հայաստանը, իբրև անկախ պետություն, որն արտաքին քաղաքականությունն իրականացնում է ելնելով իր ազգային պետական շահերից, փորձում է բարիդրացիական հարաբերություններ հաստատել և համագործակցել ինչպես տարածաշրջանի, այնպես էլ մյուս երկրների հետ: Ըստ Անդրանիկ Մարգարյանի, տարածաշրջանի կայունությանն սպառնացող ցանկացած քայլ, որի պատճառով մեր երկիրը ևս կարող է հայտնվել տնտեսական դժվարին կացության մեջ, մտահոգում է Հայաստանին, և մեր երկիրը պատրաստ է, հնարավորությունների սահմաններում, կոնֆլիկտային նոր իրավիճակների բացառման, տարածաշրջանում հավասարակշռված քաղաքականություն վարելուն ուղղված բոլոր ջանքերը խթանել:
ԻԻՀ պաշտպանության նախարարը ՀՀ վարչապետին տեղեկացրել է մեր երկիր իր այցի շրջանակներում ունեցած հանդիպումների, բանակցությունների մասին՝ գոհունակություն հայտնելով դրանց արդյունքներից: Հանդիպման կողմերը վերահաստատել են ձեռք բերված պայմանավորվածությունների կատարման ուղղությամբ ակտիվ ջանքերի ներդրման պատրաստակամությունը:
