երեքշաբթի, 20 նոյեմբերի 2007
ՀՀ վարչապետ Սերժ Սարգսյանի գլխավորած կառավարական պատվիրակությունը նոյեմբերի 21-ին երկօրյա աշխատանքային այցով կմեկնի Թուրքմենստանի մայրաքաղաք Աշխաբադ` ԱՊՀ անդամ պետությունների կառավարությունների ղեկավարների խորհրդի հերթական նիստին մասնակցելու նպատակով: Պատվիրակության կազմում են ՀՀ կառավարության աշխատակազմի ղեկավար-նախարար Մանուկ Թոփուզյանը, ՀՀ արտաքին գործերի նախարարի տեղակալ Գեղամ Ղարիբջանյանը, ԱՊՀ կանոնադրական և այլ մարմիններում ՀՀ մշտական լիազոր ներկայացուցիչ Օլեգ Եսայանը, Թուրքմենստանում ՀՀ արտակարգ և լիազոր դեսպան Արամ Գրիգորյանը, ԱՊՀ տնտեսական խորհրդին կից տնտեսական հարցերով հանձնաժողովում ՀՀ լիազոր ներկայացուցիչ Արտակ Վարդանյանը, ՀՀ կառավարության և ՀՀ արտաքին գործերի նախարարության աշխատակազմերի համապատասխան ստորաբաժանումների ղեկավարներ:
Խորհրդի նիստում կառավարությունների ղեկավարները կքննարկեն տարբեր ոլորտներում ԱՊՀ անդամ պետությունների համագործակցությանն առնչվող երկու տասնյակից ավելի հարցեր: Մասնավորապես, նախատեսվում է քննարկել և որոշումներ ընդունել 2003-2010թթ. տնտեսական ոլորտում ԱՊՀ անդամ պետությունների փոխգործակցության զարգացմանն ու արդյունավետության բարձրացմանն ուղղված կարևորագույն միջոցառումների իրականացման պլանի կատարման ընթացքի, Տնտեսական զարգացման և ինտեգրացիոն գործընթացների վերլուծության խորացման ու ընդհանուր տնտեսական իրավիճակի, ԱՊՀ անդամ երկրների տնտեսական համագործակցության միտումների և դինամիկայի վերաբերյալ` ԱՊՀ բարձրագույն մարմինների որոշումների կատարման ուղղությամբ Համագործակցության անդամ պետությունների վիճակագրական ծառայությունների ղեկավարների խորհրդի և ԱՊՀ միջպետական վիճակագրական կոմիտեի աշխատանքի, ինչպես նաև ԱՊՀ անդամ պետությունների միջտարածաշրջանային ու մերձսահմանային փոխգործակցության, էներգետիկայի, տրանսպորտի, հակաօդային պաշտպանության, հումանիտար և այլ ոլորտներում համագործակցության, ինչպես նաև կազմակերպչական հարցերի վերաբերյալ:
