հինգշաբթի, 21 մարտի 2002
Այսօր ՀՀ տարածքային կառավարման և ենթակառուցվածքների գործունեությունը համակարգող նախարար Հովիկ Աբրահամյանը ընդունեց Մեծ Բրիտանիայի միջազգային զարգացման նախարարության (DFID) պատվիրակությանը՝ Մեծ Բրիտանիայի միջազգային զարգացման դեպարտամենտի տնօրեն Արա Հովսեփյանի գլխավորությամբ: Պատվիրակությունը Հայաստանում է գտնվում մարտի 19-21-ը Ծաղկաձորում անցկացված «ՀՀ-Միացյալ Թագավորություն երկկողմ զարգացման ծրագրերի պլանավորման» աշխատանքային խորհրդակցության կապակցությամբ:
Կարևոր և արդյունավետ գնահատելով ծաղկաձորյան համաժողովի աշխատանքը, բրիտանական պատվիրակության ղեկավարը հայտնեց, որ Մեծ Բրիտանիայի միջազգային զարգացման նախարարությունը 2002թ.-ին մտադիր է որոշակի ծրագրեր իրականացնել Հայաստանում, որոնց նպատակը կառավարման համակարգի բարեփոխումներին և աղքատության նվազեցման ջանքերին աջակցելն է, մասնավորապես, աղքատության կրճատման քաղաքականությունը տարածքային և համայնքային մակարդակում իրագործելու տեսանկյունից: Ըստ նրա, նախատեսվում է այդ ուղղությամբ աշխատանքները սկսել Հայաստանի երկու՝ Գեղարքունիքի և Տավուշի մարզերում, այնուհետև կուտակված փորձը ներդնելով նաև ամբողջ հանրապետությունում:
Հանդիպման ժամանակ բրիտանական պատվիրակության անդամները նշեցին, որ այդ խնդրում ակնկալում են Հայաստանի կառավարության, ինչպես նաև Համաշխարհային բանկի ու Հայաստանում ծրագրեր իրականացնող միջազգային այլ կառույցների հետ սերտ համագործակցությունը:
Շնորհակալություն հայտնելով բրիտանական կառավարության պատվիրակությանը՝ այդօրինակ նախաձեռնության համար, Հովիկ Աբրահամյանը հավաստեց նշված ծրագրերին հնարավորինս աջակցելու ՀՀ կառավարության պատրաստակամությունը, հույս հայտնելով, որ նման սերտ համագործակցությունը անպայման հաջողություն կունենա:
