շաբաթ, 15 դեկտեմբերի 2007
Այսօր ՀՀ կառավարությունում տեղի է ունեցել ՀՀ նախագահի հրամանագրով ստեղծված` 1988թ. դեկտեմբերի 7-ին Հայաստանում տեղի ունեցած երկրաշարժի 20-ամյա տարելիցին նվիրված միջոցառումների կազմակերպման պետական հանձնաժողովի առաջին նիստը` ընդլայնված կազմով, որը վարել է հանձնաժողովի նախագահ, ՀՀ վարչապետ Սերժ Սարգսյանը: Հանձնաժողովի անդամներից բացի, նիստին, ՀՀ վարչապետի հրավերով, մասնակցել են նաև աղետի գոտին ներկայացնող Շիրակի և Լոռու մարզերի ԱԺ պատգամավորները: Սերժ Սարգսյանը մասնակիցներին նախ ներկայացրել է հանձնաժողովի գործունեության հիմնական նպատակը` նշելով, որ ՀՀ նախագահի հրամանագրի համաձայն, հանձնաժողովի աշխատանքը նպատակաուղղվելու է մինչև 2008 թվականի հունվարի 15-ը հաստատել երկրաշարժի 20-ամյա տարելիցին նվիրված միջոցառումների ծրագիրը: Իսկ մինչ այդ, ըստ վարչապետի, պետք է հանգամանորեն ու համակողմանի քննարկել բոլոր առաջարկությունները, որոնք անհրաժեշտ է հանձնաժողովի քարտուղարություն ներկայացնել մինչև հունվարի 10-ը: Սերժ Սարգսյանն ընդգծել է, որ իր համար չափազանց կարևոր է, որպեսզի մասնակիցների կողմից իրականացվելիք աշխատանքին ձևական մոտեցում չցուցաբերվի և պատրաստակամություն է հայտնել քննարկել աղետի գոտուն վերաբերող ցանկացած հարց` սկսած բնակարանային շինարարությունից մինչև այնպիսի միջոցառումներ, որոնք ուղղված կլինեն բոլոր այն մարդկանց ջանքերի գնահատմանը, ովքեր ակտիվ մասնակցություն են ունեցել աղետի հետևանքների վերացմանը: Վարչապետը նաև նշել է, թե աշխատանքի ավարտին` հաջորդ տարեվերջին, հանձնաժողովը պարտավոր է ամփոփել անցած 20 տարիներին աղետի հետևանքների վերացման ուղղությամբ արված ու չարված աշխատանքը, մեր երկրի տնտեսությանը հասցված վնասի չափն ու հետևանքները: Այդ ամենը, ըստ Սերժ Սարգսյանի, կարևոր է այն պարզ պատճառով, որ չնայած իրականացված հսկայածավալ աշխատանքին, դեռևս շատ խնդիրներ կան, որոնց մասին չպետք է լռել, անհրաժեշտ է հրապարակայնորեն խոսել, որոշակի մոտետցումներ որդեգրել ու ըստ այդմ, լուծումներ տալ դեռևս առկա խնդիրներին. «Բնավ պարտադիր չէ, որ այդ խնդիրները լուծվեն միայն պետության կողմից: Մենք պարտավոր ենք խրախուսել նաև մասնավոր հատվածին, կարևորագույն այս գործում ներգրավելով նրա հնարավորությունները ևս»,- ասել է ՀՀ վարչապետը, կարևորելով պետություն-մասնավոր հատված փոխշահավետ համագործակցության զարգացումը, այլ ոչ թե` զանազան հանգանակություններն ու դրամահավաքը:
Հանձնաժողովի նիստին հրավիրված պատգամավորները ողջունել են աղետի գոտու խնդիրների լուծման գործում բոլոր շահագրգիռ ուժերին համախմբելու և նաև առաջարկություններ ներկայացնելու հնարավորություն ընձեռելու` վարչապետի մոտեցումը:
Հանձնաժողովի անդամներն ու աղետի գոտու պատգամավորները մի շարք առաջարկություններ են ներկայացրել, որոնք մինչև հաջորդ քննարկումը կկենտրոնացվեն հանձնաժողովի քարտուղարությունում և ծրագրի հաստատումից առաջ, հանգամանորեն կքնննարկվեն:
