երեքշաբթի, 23 ապրիլի 2002
ՀՀ վարչապետ Անդրանիկ Մարգարյանի խոսքը
Հայոց ցեղասպանության զոհերի հիշատակի
օրվա կապակցությամբ
Սիրելի հայրենակիցներ,
Անցյալ դարասկզբին Օսմանյան Թուրքիայի կողմից իրագործված Հայոց ցեղասպանության զոհերի հիշատակի այս օրը մեր սուրբ նահատակների շիրիմներին խոնարհումից բացի, նաև ոգեկոչման օր է: Ստեղծագործ, խաղաղասեր մեր ժողովուրդը միասնական ուժերով հզոր ու բարգավաճ Հայաստան կերտելուց զատ այլընտրանք չունի. ուժեղ բանակն ու զարգացած տնտեսությունն են ժողովրդի և պետության անվտանգության առաջին գրավականը:
Մենք ողջունում ենք Հայոց ցեղասպանության միջազգային ճանաչմանը, դատապարտմանն ու այդպիսով պատմական արդարության վերականգնմանն ուղղված ցանկացած նախաձեռնություն, որը հիմք կդառնա մարդկության պատմության մեջ այդօրինակ ոճրագործությունները մեկընդմիշտ բացառելու, որտեղ և որ ժողովրդի դեմ էլ դրանք ուղղված լինեն:
Համամարդկային արժեքներին իր հավատարմությունն ապացուցած Հայաստանի Հանրապետությունն այս մտահոգությամբ, նաև իր հարևանների ու աշխարհի բոլոր ժողովուրդների հետ 21-րդ դարում խաղաղ գոյակցելու և համագործակցելու ցանկությամբ է շարունակում իր արտաքին քաղաքականության մեջ Հայոց ցեղասպանության միջազգային ճանաչման հարցը գերակա համարել:
Երրորդ հազարամյակ ոտք դրած աշխարհը դեռ չի խաղաղվել. ահաբեկչությունները, ժողովուրդների ազատ կամքի նկատմամբ բռնությունները, պատերազմները նոր մարտահրավեր են՝ նետված քաղաքակիրթ աշխարհին, որին ընդհանուր ջանքերով չդիմակայելու, պատմության դասերից հետևություններ չանելու դեպքում, հետևանքները չափազանց ծանր կարող են լինել:
