հինգշաբթի, 25 ապրիլի 2002
Այսօր տեղի ունեցավ ՀՀ կառավարության նիստ, որը վարեց վարչապետ Անդրանիկ Մարգարյանը:
Մինչ օրակարգի հարցերին անցնելը, վարչապետն անդրադարձավ վերջին շրջանում, ոչ բարենպաստ եղանակի պատճառով, հանրապետության մի շարք մարզերում առաջացած խնդիրներին՝ կառավարության անդամների ուշադրությունը հրավիրելով առկա մտահոգիչ իրավիճակի վրա: Նրա հանձնարարությամբ, նախարարներ Հովիկ Աբրահամյանը, Դավիթ Զադոյանը, Արմեն Մովսիսյանը ներկայացրին այդ պահի դրությամբ վիճակը մարզերում, նշելով, որ տեղացած ձյան, անձրևների, ցրտի պատճառով արձանագրվել են ցրտահարության դեպքեր, 11 գյուղ հոսանքազրկված է: Աշխատանքներ են տարվում մինչև օրվա ավարտը էլեկտրաէներգիայի մատակարարումը այդ բնակավայրերում վերականգնելու ուղղությամբ: Վարչապետը հանձնարարեց օպերատիվ կարգով ձևավորել հանձնաժողով՝ շահագրգիռ նախարարությունների, մարզպետարանների ներկայացուցիչների և գյուղատնտեսության գծով վարչապետի խորհրդականի մասնակցությամբ, ճշտել պատճառված վնասի չափը, առաջարկներ ներկայացնել փոխհատուցման վերաբերյալ:
Նիստում կառավարությունը հավանություն տվեց «Հայաստանի Հանրապետության 2001 թվականի պետական բյուջեի կատարման տարեկան հաշվետվությունը հաստատելու մասին» ՀՀ օրենքի նախագծին, որը սահմանված կարգով կներկայացվի Ազգային Ժողովի հաստատմանը:
Հավանության արժանացան նաև «Հայաստանի Հանրապետության ջրային օրենսգիրք» և «Ջրօգտագործողների ընկերությունների և ջրօգտագործողների ընկերությունների միությունների մասին» ՀՀ օրենքների նախագծերը: Ընդգծելով այդ օրենքների կարևորությունը, նշվեց, որ դրանց ընդունումը նպատակ ունի բարձրացնել խմելու և ոռոգման ջրի համակարգերի արդյունավետությունը, կարգավորել այդ ոլորտի իրավահարաբերությունները և զարգացնել գյուղացիական տնտեսությունների ինքնակառավարումը:
ՀՀ հողային օրենսգրքի պահանջների համաձայն, կառավարությունը որոշում ընդունեց քաղաքացիների և իրավաբանական անձանց սեփականություն հանդիսացող գյուղատնտեսական նշանակության հողամասերի վրա բնակելի, հասարակական, արտադրական նշանակության շենքերի և շինությունների կառուցումը սահմանափակելու մասին: Հաստատվեց այն համայնքների ցանկը, որոնց վարչական սահմաններում նշված աշխատանքներն արգելվում են: Ցանկում չընդգրկված համայնքներում, առնվազն 1 հա տարածք ունեցող հողամասերի վրա թույլատրվեց կառուցել մինչև 150 քմ բնակելի և 300 քմ գյուղատնտեսական արտադրական նշանակության շենքեր և շինություններ: Բոլոր համայնքների վարչական սահմաններում ընդգրկված գյուղատնտեսական նշանակության հողամասերի վրա թույլատրվեց կառուցել կենցաղային, տնտեսական նշանակության շենքեր և շինություններ՝ մինչև 30 քմ կառուցապատման ընդհանուր մակերեսով:
Ելնելով «Պետական ոչ առևտրային կազմակերպությունների մասին» ՀՀ օրենքի պահանջներից, գործադիրը հաստատեց «Հայկական գյուղատնտեսական ակադեմիա», «Երևանի պետական տնտեսագիտական ինստիտուտ», «Երևանի Մխիթար Հերացու անվան պետական բժշկական համալսարան» պետական ոչ առևտրային կազմակերպությունների կանոնադրությունները:
Հաստատվեցին Հայաստանի Հանրապետությունում դեղերի արտադրության, դեղատնային գործունեության, բժշկական օգնության և սպասարկման, միջին մասնագիտական և բարձրագույն կրթական ծրագրերի իրականացման լիցենզավորման կարգերը, նշված գործունեությունների իրականացման լիցենզիայի ձևերը, ինչպես նաև նոտարի կողմից մատուցվող վճարովի ծառայությունների սակագները:
Կառավարությունը որոշում ընդունեց Երևանի «Զվարթնոց» օդանավակայանի վերակառուցման և ընդարձակման ծրագրի իրականացման միջոցառումների մասին, որով հաստատեց օդանավակայանի տարածքին հարող՝ պետության կարիքների համար վերցվող անշարժ գույքի օտարման գոտին:
Գործադիրը համաձայնություն տվեց «ԱՊՀ մարմիններում ԱՊՀ մասնակից պետությունների ներկայացուցիչների իրավական կարգավիճակի մասին» համաձայնագրի կնքման առաջարկությանը:
Որոշումներ ընդունվեցին «Դիակոնիա» բարեգործական հիմնադրամի «Հույսի ավան» ծրագրի, «ԱԳԱՊԵ» բարեգործական կազմակերպության Հայաստանի մասնաճյուղի բարեգործական ծրագրի շրջանակներում իրականացվելիք փոխհատուցումների վերաբերյալ:
