չորեքշաբթի, 13 փետրվարի 2008
ՀՀ վարչապետ Սերժ Սարգսյանն այսօր ընդունել է Իրանի Իսլամական Հանրապետության նորանշանակ արտակարգ և լիազոր դեսպան Սեյեդ Ալի Սաղայիանին:
Վարչապետը նախ շնորհավորել է պրն Սաղայիանին` մեր երկրում իր դիվանագիտական առաքելությունն սկսելու կապակցությամբ, վստահություն հայտնելով, որ Հայաստանի և Իրանի միջև հարաբերությունները նրա պաշտոնավարման շրջանում ևս նույն հաջողությամբ կշարունակեն զարգանալ: Սերժ Սարգսյանն ընդգծել է, որ Իրանը Հայաստանի համար եղել և շարունակում է մնալ կարևոր երկիր, որի հետ բարեկամությունն ու համագործակցությունը պատմական խորը արմատներ և հարուստ ավանդույթներ ունեն, ինչը պարտավորեցնում է համադրել և ավելացնել ջանքերը` արդեն իսկ ընթացքի մեջ գտնվող համատեղ ծրագրերը հաջողությամբ ավարտին հասցնելու և փոխշահավետ նոր նախաձեռնություններով հանդես գալու:
Սեյեդ Ալի Սաղայիանը Սերժ Սարգսյանին է փոխանցել Իրանի առաջին փոխնախագահ պարոն Դավուդիի ջերմ ողջույնները: Նա նշել է, որ մինչև դեսպանի պաշտոնում նշանակվելը, բազմիցս եղել է Հայաստանում, ծանոթ է մեր երկրում ընթացող զարգացումներին և պատրաստակամ է առավելագույն ջանքեր գործադրել երկու երկրների միջև հարաբերությունների հետագա սերտացման համար:
Զրույցի ընթացքում կողմերը նշել են, որ Հայաստանի և Իրանի միջև հարաբերությունները` հատկապես էներգետիկայի, տրանսպորտի բնագավառներում բավականին դինամիկ են զարգանում, մեծ հնարավորություններ կան նաև գիտության, տեխնոլոգիաների, կրթության, մշակույթի և այլ ոլորտներում գործակցությունը զարգացնելու համար: Գոհունակություն հայտնելով երկկողմ տնտեսական հարաբերությունների մակարդակից, վարչապետ Սերժ Սարգսյանը և դեսպան Սեյեդ Ալի Սաղայիանն ընդգծել են, որ երկու երկրների միջև ապրանքաշրջանառության ծավալը դեռևս չի համապատասխանում քաղաքական հարաբերությունների մակարդակին և առկա ներուժին: Նրանք կարևորել են այդ ուղղությամբ ևս երկուստեք գործուն քայլերի իրականացումը:
Հանդիպման ավարտին վարչապետ Սերժ Սարգսյանը ՀՀ կառավարության անունից պատրաստակամություն է հայտնել հնարավորինս աջակցել երկու երկրների միջև բազմաբնույթ հարաբերությունների հետագա խորացմանը միտված` դեսպան Սեյեդ Ալի Սաղայիանի ջանքերին:
