երկուշաբթի, 10 մարտի 2008
Այսօր հեռախոսազրույց է տեղի ունեցել ՀՀ նորընտիր նախագահ, ՀՀ վարչապետ Սերժ Սարգսյանի և ՌԴ նախագահ Վլադիմիր Պուտինի միջև: ՌԴ նախագահը վերստին շնորհավորել է Սերժ Սարգսյանին` ՀՀ նախագահ ընտրվելու կապակցությամբ, այնուհետ Հայաստանի ներքաղաքական իրավիճակի հետ կապված` իր զորակցությունը հայտնել Հայաստանի իշխանությանը և ժողովրդին: Վլադիմիր Պուտինը կարևորել է Հայաստանում ետընտրական շրջանում ստեղծված ներքաղաքական իրավիճակը քաղաքական մեթոդներով, ընդդիմության հետ երկխոսության ճանապարհով կարգավորելու անհրաժեշտությունը` ելնելով հայ ժողովրդի միասնականության, երկրի կայունության ու անվտանգության շահերից և ի նպաստ Հայաստանի և Ռուսաստանի միջև հարաբերությունների հետագա առավել ամրապնդման ու զարգացման, հայ և ռուս ժողովուրդների բարեկամության:
Սերժ Սարգսյանի հետ ունեցած հեռախոսազրույցի ժամանակ ՌԴ նախագահը նաև վերահաստատել է Ռուսաստանի Դաշնություն այցի իր հրավերը, նշելով, որ ուրախ կլինի Սերժ Սարգսյանին հարմար ցանկացած ժամկետում հյուրընկալել նրան և ՀՀ նորընտիր նախագահի հետ ավելի հանգամանորեն քննարկել հայ-ռուսական հարաբերությունների ամրապնդմանն ու հեռանկարին առնչվող հարցերը:
