չորեքշաբթի, 12 հունիսի 2002
Այսօր ՀՀ վարչապետ Անդրանիկ Մարգարյանն ընդունեց «Հովարդ Կարագյոզյան» հիշատակի ընկերակցության տնօրենների խորհրդի անդամներին խորհրդի նախագահ Մայքլ Հարոթունյանի գլխավորությամբ: Պատվիրակությունը Հայաստանում է գտնվում հայրենիքում ընկերակցության գործունեության 10-ամյակի հանդիսություններին մասնակցելու նպատակով:
Ավելի քան 80 տարի առաջ Նյու Յորքում հիմնված և սփյուռքում բարեգործական աշխատանքների մեծ փորձ ունեցող «Հովարդ Կարագյոզյան» ընկերակցությունը Հայաստանում իր գործունեությունն սկսել է 1988 թվականին աջակցության ծրագրեր իրականացնելով աղետի գոտում: Վարչապետի հետ հանդիպմանը խորհրդի անդամները ներկայացրին Հայաստանի անկախացումից հետո անցած 10 տարիներին մանկական առողջապահության մասնավորապես ատամնաբուժության և ակնաբուժության, ինչպես նաև սոցիալական բնագավառներում հաստատության իրականացրած ավելի քան 3 մլն դոլարի արժողությամբ բարեգործական ծրագրերը: Պատվիրակության ներկայացուցիչներն ընդգծեցին այն օպերատիվ և շահագրգիռ աջակցությունը, որ հայրենի կառավարությունը, համապատասխան նախարարություններն ու գերատեսչությունները ցուցաբերում են իրենց աշխատանքներին:
Բարձր գնահատելով ընկերակցության 10-ամյա գործունեությունը Հայաստանում ու Արցախում, և շնորհակալություն հայտնելով խորհրդի անդամներին արդյունավետ, նպատակաուղղված աշխատանքի համար, վարչապետ Անդրանիկ Մարգարյանը հավաստեց, որ «Հովարդ Կարագյոզյան» ընկերակցության հետ Հայաստանի կառավարության համագործակցությունը հայրենիք-սփյուռք կապի, գործնական հարաբերությունների լավագույն օրինակներից է: Նշելով, որ կառավարությունը մեծ ուշադրություն է հատկացնում, մասնավորապես, հանրապետության սահմանամերձ մարզերի ամրապնդման ու զարգացման խնդիրներին և այդ ուղղությամբ արդեն իսկ իրականացնում է որոշակի ծրագրեր, վարչապետն առաջարկեց հնարավորության սահմաններում առողջապահական խնդիրներից բացի, ընկերակցության գործունեությունն ուղղել նաև սահմանամերձ մարզերի սոցիալական հիմնահարցերի լուծմանը:
Հանդիպման ժամանակ արված առաջարկությունները հաշվի առնելով, մտքեր փոխանակվեցին «Հովարդ Կարագյոզյան» ընկերակցության 2002 թ. ծրագրերի հստակեցման շուրջ, որոնց համար նախատեսված է ներդնել 1 մլն 14 հազար ԱՄՆ դոլար:
