ուրբաթ, 14 մարտի 2008
ՀՀ վարչապետ Սերժ Սարգսյանն այսօր ընդունել է Եվրոպայի խորհրդի մարդու իրավունքների հանձնակատար Թոմաս Համմարբերգին և նրա գլխավորած պատվիրակությանը:
Զրուցակիցներն անդրադարձել են հետընտրական շրջանում ստեղծված իրավիճակին, քննարկել այդ իրավիճակից երկիրը դուրս բերելու հնարավորությունները: Վարչապետ Սերժ Սարգսյանն ընդգծել է, որ Հայաստանի իշխանություններն ամեն ինչ անելու են, որպեսզի կայունությունը երկրում վերահաստատվի:
ԵԽ մարդու իրավունքների հանձնակատարը վարչապետին է ներկայացրել Հայաստանում գտնվելու այս օրերին իր ունեցած բազմաթիվ հանդիպումների արդյունքում ձևավորված կարծիքն ու ստացած տպավորությունները, որոնք, պարոն Համմարբերգի հավաստմամբ, ամբողջական տեսքով թղթին կհանձնի Ստրասբուրգ վերադառնալուց հետո: Ստեղծված իրավիճակում նա չափազանց կարևոր է համարել հավասարակշռված մոտեցումը և համակարծիք է եղել Սերժ Սարգսյանի հետ այն հարցում, որ պետք է պատժվեն միայն այն անձինք, ովքեր հստակ քրեական հանցագործություն են կատարել:
Թոմաս Համմարբերգը շեշտել է, որ Հայաստանը Եվրոպական խորհրդի համար շատ կարևոր երկիր է և պատրաստակամություն է հայտնել մեծ սիրով շարունակել Սերժ Սարգսյանի հետ համագործակցությունը` ՀՀ նախագահի պաշտոնը ստանձնելուց հետո ևս:
