ուրբաթ, 21 հունիսի 2002
Հունիսի 21-ին տեղի ունեցավ ՀՀ կառավարության մարդասիրական օգնության կենտրոնական հանձնաժողովի հերթական նիստը, որը վարում էր հանձնաժողովի նախագահ Վ.Մովսիսյանը:
Հանձնաժողովը քննարկեց 2002-2006 թվականների ընթացքում իրականացվող 5 երկարաժամկետ բարեգործական ծրագիր:
Քննարկվեց և հաստատվեց սփյուռքահայ բարերարների ֆինանսավորմամբ Մայր Աթոռ Սուրբ Էջմիածնի կողմից իրականացվող շինարարական լայնածավալ ծրագիրը:
Ծրագրի շրջանակներում հիմնովին կվերանորոգվեն պատմա-մշակութային մեծ արժեք ներկայացնող եկեղեցիները, վանքային համալիրները և դրանց հարակից կառույցները: Նպատակ ունենալով վերականգնել Հայ Առաքելական Եկեղեցու պատմականորեն ձ—ավորված ավանդույթները, կվերանորոգվեն ու կվերագործարկվեն եկեղեցիներին կից գործող ծերանոցները, կուսանոցները, թանգարանները և սոցիալապես անապահով ընտանիքների երեխաների համար նախատեսվող ծխական դպրոցներն ու հանգստյան տները: Մայր Աթոռը նպատակ ունի նաև ստեղծել միջնադարյան բնաբուժության կենտրոն:
Շարունակելով 1988 թվականից հետո ձ—ավորված բարի ավանդույթը, Ռուսաստանյան Դաշնության կառավարությունը միջոցներ է տրամադրել երկրաշարժից տուժած Ախուրյանի հիվանդանոցային համալիրի մասնաշենքի վերակառուցման և հիմնանորոգման համար: Բարեգործական որակելով նաև այս ծրագիրը, Հայաստանի Հանրապետության կառավարությունը իր վրա է վերցնում շինարարական աշխատանքների դիմաց հաշվարկվող ավելացված արժեքի հարկի փոխհատուցման խնդիրը:
«Հայ-ամերիկյան առողջության կենտրոն» հիմնադրամը նույնպես շինարարական աշխատանքներ կծավալի: Հիմնադրամի միջոցներով կվերանորոգվի Հայ-ամերիկյան մամոգրաֆիայի համալսարանական կենտրոնի շենքը, կենտրոնի համար կկառուցվի կաթսայատուն, կանցկացվեն գազի ու ջեռուցման խողովակագծերը: Մամոգրաֆիայի համալսարանական կենտրոնի համար արտերկրից կներմուծվեն բժշկական նորագույն սարքավորումներ, որոնք հնարավորություն կտան օնկոլոգիայի բնագավառում նոր նվաճումների մակարդակով մամոգրաֆիկ հետազոտություններ կազմակերպել:
Հանձնաժողովը քննարկեց և հաստատեց նաև «Զարթոնք» կրթական, մշակութային և սոցիալական զարգացման հիմնադրամի կողմից իրականացվող «Թալինի ակադեմիական միջնակարգ գիշերօթիկ վարժարանի վերակառուցում» ծրագիրը:
Նիստում քննարկվեցին նաև առանձին բարեգործական ու հասարակական կազմակերպությունների հասցեով ուղարկված բարեգործական բեռների ներմուծման, բաշխման և այլ հարցեր:
