չորեքշաբթի, 19 մարտի 2008
ՀՀ նորընտիր նախագահ, ՀՀ վարչապետ Սերժ Սարգսյանն այսօր ընդունել է ՌԴ արտաքին գործերի նախարարի տեղակալ, պետքարտուղար Գրիգորի Կարասինին: Նա Սերժ Սարգսյանին է փոխանցել ՌԴ նախագահ Վլադիմիր Պուտինի և նորընտիր նախագահ Դմիտրի Մեդվեդևի ջերմ ողջույններն ու նշել, որ Մոսկվայում նախապատրաստում են առաջիկա օրերին կայանալիք ՀՀ նորընտիր նախագահ պարոն Սերժ Սարգսյանի այցը Ռուսաստանի Դաշնություն և մեծ կարևորություն են տալիս երկու երկրների միջև հարաբերությունների առավել սերտացմանը, համագործակցության հետագա ընդլայնմանն ու զարգացմանը:
Հանդիպման ընթացքում զրուցակիցներն անդրադարձել են Հայաստանի հետընտրական գործընթացներին ու ներքաղաքական իրավիճակին: ՀՀ նորընտիր նախագահ, ՀՀ վարչապետ Սերժ Սարգսյանն ընդգծել է, որ Հայաստանի իշխանությունների համար պետության կայունությունն ու ժողովրդի անվտանգության ապահովումը վեր են ցանկացած այլ շահերից և, նրա հավաստմամբ, հետագա գործողությունները ևս բխելու են միմիայն այդ ելակետից ու երկրում օրենքի գերակայությունից:
Սերժ Սարգսյանը կարևորել է նաև հասարակության համախմբվածության, երկրում հանդուրժողականության ու երկխոսության մթնոլորտի ստեղծումը, վերստին շեշտելով երկխոսության իր պատրաստակամությունը բոլոր նրանց հետ, ովքեր ևս պատրաստ են այդ քայլին և ում, իրապես, մտահոգում են մեր երկրի ապագան ու մեր ժողովրդի ճակատագիրը:
