հինգշաբթի, 27 մարտի 2008
ՀՀ նորընտիր նախագահ, վարչապետ Սերժ Սարգսյանը` Թատրոնի միջազգային օրվա կապակցությամբ, այսօր կառավարությունում ընդունել է թատերական արվեստի բնագավառի մի շարք ներկայացուցիչների, այդ թվում` ներդրած նշանակալի ավանդի համար ՀՀ նախագահի կողմից ՀՀ պատվավոր կոչումների արժանացած արվեստագետներին: Ի դեմս նրանց, Սերժ Սարգսյանը շնորհավորել է հանրապետության բոլոր դերասաններին, ռեժիսորներին, դրամատուրգներին և ամբողջ հայ թատերասեր հանրությանը, քաջառողջություն, նոր հաջողություններ ու ստեղծագործական եռանդ մաղթելով հայ բեմի երախտավորներին` նրանց գործունեությունը թատրոնում գնահատելով որպես դժվարին, բայցև պատվաբեր աշխատանք: Միաժամանակ, Սերժ Սարգսյանը պատրաստակամություն է հայտնել առաջիկայում կրկին հանդիպել նրանց հետ` թատերական աշխարհին առնչվող հարցերի հանգամանալից քննարկման և առկա հիմնախնդիրները միասնաբար լուծելու նպատակով:
Հանդիպման ընթացքում վարչապետը ՀՀ նախագահի հրամանագրով ժողովրդական և վաստակավոր արտիստի կոչումների արժանացած անձանց հանձնել է իրենց պարգևները և շնորհավորել այդ կապակցությամբ ևս:
