ուրբաթ, 19 հուլիսի 2002
Այսօր ՀՀ կառավարությունում տեղի է ունեցել «Հայջրմուղկոյուղի» փակ բաժնետիրական ընկերության կառավարումը մասնավոր կառավարչին հանձնելու գործընթացը կազմակերպելու համար խորհրդատուի ընտրության մրցութային միջգերատեսչական հանձնաժողովի նիստ՝ հանձնաժողովի նախագահ, ՀՀ տարածքային կառավարման և ենթակառուցվածքների գործունեությունը համակարգող նախարար Հ. Աբրահամյանի ղեկավարությամբ: Նիստում, ընդհանուր առմամբ, հավանության է արժանացել ՀՀ ջրտնտպետկոմիտեի ջրամատակարարման և ջրահեռացման ծառայություններ մատուցող փակ բաժնետիրական ընկերությունների /նրանց մասնաճյուղերի/ գույքը հավատարմագրային կառավարման հանձնելու պայմանագրի պարտադիր դրույթները և դրանց հիման վրա մշակված փակ բաժնետիրական ընկերության գույքը հավատարմագրային կառավարման հանձնելու օրինակելի պայմանագիրը:
Հավատարմագրային կառավարման հանձնելու հիմնական պայմանները ներառում են Հայաստանի Հանրապետության կառավարությանն առընթեր ջրային տնտեսության պետական կոմիտեի համակարգի ջրային տնտեսության ընկերությունների գործունեության և կառավարման բարելավման ծրագրի, 2001-2005 թվականների ֆինանսական հոսքերի և դրանց իրականացման միջոցառումների մասին ՀՀ կառավարության 2001թ. մայիսի 17-ի N440 որոշմամբ հաստատված՝ վարձավճարների հավաքագրման մակարդակի, ջրօգտագործման խնայողական ռեժիմի և համակարգի կառավարման արդյունավետության ծրագրային ցուցանիշները:
Պայմանագրով նախատեսվում է «Հավատարմագրային կառավարչի վարձատրություն»՝ ծրագրով նախատեսված հավաքագրման և դրա աճի տեմպի ցուցանիշներն ապահովելու դեպքում հասույթի 10 տոկոսի չափով, և լրացուցիչ վարձատրություն՝ այդ ցուցանիշները գերակատարելու դեպքում:
Պետական գույքը հավատարմագրային կառավարման է հանձնվում 5 տարով, նախատեսված է պայմանագրի վերակնքման հնարավորություն ևս 5 տարի ժամկետով:
