երեքշաբթի, 6 օգոստոսի 2002
Այսօր ՀՀ վարչապետ Անդրանիկ Մարգարյանն ընդունել է Ռումինիայի Հանրապետության արտակարգ և լիազոր դեսպան Պավել Պլատոնային, որն ավարտում է իր դիվանագիտական առաքելությունը մեր երկրում:
Շնորհակալություն հայտնելով Հայաստանի կառավարությանը և անձամբ վարչապետ Անդրանիկ Մարգարյանին անցած ավելի քան երեք տարիների ընթացքում դեսպանության գործունեությանը ցուցաբերած աջակցության համար, պարոն Պլատոնան նշել է, որ դժվարությամբ է հեռանում այն երկրից, ուր հանդիպել է բարեկամական շատ ջերմ վերաբերմունքի: Դեսպանը հավաստիացրել է, որ այսուհետ ևս որտեղ էլ որ շարունակելու լինի իր գործունեությունը, ներդնելու է բոլոր կարողությունները՝ ի նպաստ Հայաստանի և Ռումինիայի, հայ և ռումին ժողովուրդների միջև բարեկամության հետագա խորացման: Ընդգծելով երկու երկրների միջև հատկապես տնտեսական կապերի զարգացման կարևորությունը, պրն Պլատոնան Անդրանիկ Մարգարյանին է փոխանցել այս տարվա աշնանը կառավարության մակարդակով Բուխարեստում կայանալիք ինֆորմատիկայի խնդիրներին վերաբերող համաժողովին մասնակցելու Ռումինիայի Հանրապետության վարչապետի հրավերը:
ՀՀ վարչապետ Անդրանիկ Մարգարյանը բարձր է գնահատել Հայաստանում Ռումինիայի Հանրապետության առաջին դեսպան պրն Պլատոնայի անձնական և մասնագիտական ներդրումը երկու երկրների միջև քաղաքական, տնտեսական, մշակութային կապերի և փոխհարաբերությունների ամրապնդման գործում: Վարչապետը նշել է, որ դեսպանի ջանքերի շնորհիվ հայ և ռումին ժողովուրդների դարավոր բարեկամությունը վերածվել է նաև երկու պետությունների բարեկամության: Հույս հայտնելով, որ նոր դեսպանի նշանակումից հետո ևս Հայաստանի և Ռումինիայի միջև ստեղծված բազմակողմ կապերը նույն հաջողությամբ կշարունակեն զարգանալ, Անդրանիկ Մարգարյանը հաջողություններ է մաղթել Պավել Պլատոնային հետագա գործունեության մեջ և անձնական կյանքում:
