երեքշաբթի, 29 ապրիլի 2008
ՀՀ վարչապետ նշանակվելու կապակցությամբ, Տիգրան Սարգսյանին շնորհավորել է «Կրեդիտ Ագրիկոլ» բանկի նախագահ Ռընե Կառոնը: Շնորհավորական ուղերձում, մասնավորապես, ասված է.
«Մեծ հաճույքով տեղեկացա Ձեր` Հայաստանի Հանրապետության վարչապետի պաշտոնում նշանակվելու մասին: Այդ կապակցությամբ թույլ տվեք «Կրեդիտ Ագրիկոլ»-ի անունից Ձեզ հղել իմ անկեղծ շնորհավորանքները:
2004թ. մայիսին ես առիթ եմ ունեցել հանդիպելու Ձեզ Երևանում` Կենտրոնական բանկի Ձեր ղեկավար եղած ժամանակ` «Կրեդիտ Ագրիկոլ»-ի միջազգային համադաշնության կենտրոնական կոմիտեի իմ նախագահած ժողովի ընթացքում: Այնուհետև, մեզ համար հաճելի էր հյուրընկալել Հայաստանի բանկերի ներկայացուցիչների Ձեր գլխավորած պատվիրակությանը Փարիզում տեղակայված «Կրեդիտ Ագրիկոլ»-ի նստավայրում:
Տարբեր առիթներով մենք հնարավորություն ենք ունեցել գնահատելու Ձեր արհեստավարժ խստությունը, լսելու ունակությունը և Ձեր բաց միտքը: Ձեր ղեկավարության ժամանակահատվածում Կենտրոնական բանկը և Հայաստանի բանկային համակարգը շատ մեծ առաջընթաց ունեցան, ինչը Ձեր երկրի զարգացման համար կարևոր բաղադրիչ է հանդիսանում: Դուք քաջ տեղյակ եք ԱԿԲԱ բանկի ստեղծման և զարգացման գործում «Կրեդիտ Ագրիկոլ»-ի ունեցած դերակատարման մասին (սկսած 1993թ.) ի սկզբանե խորհրդատվական աջակցությամբ և անձնակազմի պատրաստմամբ, այնուհետև` առևտրական և համակարգային գործընկերությամբ և, ի վերջո, 28 տոկոս մասնաբաժնով ռազմավարական մասնակցությամբ, ինչը Դուք հաստատեցիք 2006թ. հոկտեմբերին:
Հղում եմ Ձեզ իմ ամենաանկեղծ և բարեկամական մաղթանքները` ի նպաստ Ձեր երկրի զարգացման և հայ ժողովրդի բարգավաճման:
Ես մեծ սիրով կրկին կհանդիպեմ Ձեզ և ԱԿԲԱ բանկի գլխավոր տնօրեն Ստեփան Գիշյանի հետ Փարիզում կամ Երևանում` մեկ անգամ ևս վերահաստատելու մեր համագործակցության ամրապնդումը»:
* * *
Հայաստանի Հանրապետության վարչապետի պաշտոնում նշանակվելու կապակցությամբ Տիգրան Սարգսյանին շնորհավորել է նաև Ղրղզստանի Հանրապետության ազգային բանկի նախագահ Մարատ Ալապաևը: Շնորհավորական խոսքում, մասնավորապես, ասված է.
«Ղրղզստանի Հանրապետության ազգային բանկի կոլեկտիվի և իմ անունից թույլ տվեք շնորհավորել Ձեզ` Հայաստանի Հանրապետության վարչապետի պաշտոնում նշանակվելու կապակցությամբ:
Ընդունեք մեր ամենաանկեղծ բարեմաղթանքները` քաջառողջություն և անսպառ եռանդ, խաղաղություն և բարիք, բարօրություն և մեծ հաջողություններ Ձեր պատասխանատու աշխատանքում` ի նպաստ Հայաստանի զարգացման ու բարգավաճման:
Օգտվելով առիթից, իմ խորին երախտագիտությունն եմ հայտնում Ձեզ` մեր բանկերի միջև հաստատված բեղմնավոր հարաբերությունների զարգացման գործում Ձեր ունեցած ներդրման համար, հուսալով, որ դրանք այսուհետ ևս կշարունակվեն»:
