հինգշաբթի, 15 օգոստոսի 2002
Այսօր տեղի ունեցավ ՀՀ կառավարության նիստ, որը վարեց վարչապետ Անդրանիկ Մարգարյանը:
Հանրապետության սոցիալ-տնտեսական զարգացման մեջ գիտության գործուն դերն ապահովելու, գիտական հետազոտությունների արդյունքները տնտեսության մեջ արդյունավետ օգտագործելու, համաշխարհային ընկերակցության մեջ մեր երկրի կայուն տեղն ապահովելու նպատակով, կառավարությունը հաստատեց Հայաստանի Հանրապետությունում գիտության և տեխնիկայի զարգացման գերակայությունները: Ցանկում ընդգրկված են, մասնավորապես, հայագիտությունը, հիմնարար հետազոտությունները, տեղեկատվական տեխնոլոգիաները, առաջատար տեխնոլոգիաները, էներգիայի նոր աղբյուրները և այլն:
Գործադիրը հավանություն տվեց «1988-1992 թվականներին Ադրբեջանի Հանրապետությունից բռնագաղթված փախստականների համար օտարերկրյա պետությունների և միջազգային կազմակերպությունների միջոցներով կառուցված բնակարանները սեփականության իրավունքով փախստականներին հատկացնելու մասին» ՀՀ օրենքի նախագծին:
Ելնելով «Պետական կառավարչական հիմնարկների մասին» ՀՀ օրենքի պահանջներից, կառավարությունը որոշեց ստեղծել «Հայաստանի Հանրապետության առողջապահության նախարարության աշխատակազմ» պետական կառավարչական հիմնարկ: Հաստատվեցին առողջապահության նախարարության կանոնադրությունը և աշխատակազմի կառուցվածքը: Մեկ այլ որոշմամբ գործադիրը հաստատեց նաև առողջապահության նախարարության պետական առողջապահության գործակալության կանոնադրությունն ու կառուցվածքը:
Նիստում որոշում ընդունվեց առողջապահության նախարարության պետական հիգիենիկ և հակահամաճարակային ծառայությունը առանձնացված ստորաբաժանման կարգավիճակով, նախարարության կազմում գործող ՀՀ պետական հիգիենիկ և հակահամաճարակային տեսչության վերակազմակերպելու, տեսչության կանոնադրությունն ու կառուցվածքը հաստատելու մասին: Մեկ այլ որոշմամբ, նույն նախարարության «Դատաբժշկական, գիտագործնական կենտրոն» պետական հիմնարկը վերակազմավորման ձևով վերակազմակերպվեց պետական ոչ առևտրային կազմակերպության:
Կառավարությունը հաստատեց 2002 թ. ապրիլի 20-ին ստորագրված «Հայաստանի Հանրապետության առողջապահության նախարարության և Արաբական Միացյալ Էմիրությունների առողջապահության նախարարության միջև առողջապահության և բժշկագիտության բնագավառում համագործակցության մասին» միջգերատեսչական համաձայնագիրը:
Ականավոր ճարտարապետ Ալեքսանդր Թամանյանի հիշատակը հավերժացնելու նպատակով, գործադիրը որոշեց ստեղծել «Ալեքսանդր Թամանյանի թանգարան-ինստիտուտ» պետական ոչ առևտրային կազմակերպություն և հաստատեց կանոնադրությունը: Քաղաքաշինության նախարարության «Ճարտարապետության ազգային թանգարան-ինստիտուտ» պետական հիմնարկ ևս վերակազմակերպվեց պետական ոչ առևտրային կազմակերպության:
Մեկ այլ որոշմամբ, Արագածոտնի, Արմավիրի, Սյունիքի, Շիրակի, Գեղարքունիքի, Կոտայքի մարզային և Երևանի քաղաքային ենթակայության մարզադպրոցները նույնպես վերակազմակերպվեցին պետական ոչ առևտրային կազմակերպությունների:
«Բաժնետիրական ընկերությունների մասին» ՀՀ օրենքին համապատասխան, կառավարությունը որոշում ընդունեց նաև «Ագրոգիտություն», «Ագրոպրես» և «Ագրոգիտարտ» պետական փակ բաժնետիրական ընկերությունները վերակազմակերպելու մասին «Արգոպրես» և «Ագրոգիտարտ» ՊՓԲԸ-ները «Ագրոգիտություն» ՊՓԲԸ-ին միացնելու ձևով: Որոշմամբ «Ագրոգիտություն» ՊՓԲԸ-ն վերանվանվեց «Գյուղատնտեսության աջակցության հանրապետական կենտրոն» փակ բաժնետիրական ընկերություն:
Ելնելով ՀՀ ֆինանսների և էկոնոմիկայի նախարարության և ԱՄՆ գանձապետարանի միջև կնքված և ՀՀ կառավարության հավանությանն արժանացած փոխըմբռնման հուշագրից, գործադիրը որոշեց ստեղծել «Ուսուցման կենտրոն» պետական ոչ առևտրային կազմակերպություն: Կենտրոնի ստեղծումը պայմանավորված է կառավարման և վերահսկողության, ծրագրերի իրականացման և պետական ֆինանսների կառավարմանն առնչվող այլ ոլորտներում զբաղված բյուջետային հիմնարկների աշխատողների մասնագիտական կատարելագործման պահանջով:
Այլ որոշումներով, կառավարությունը հաստատեց «Հայաստանի Հանրապետության գյուղատնտեսության նախարարության և Ուրուգվայի Արևելյան Հանրապետության անասնաբուծության, գյուղատնտեսության և ձկնորսության նախարարության միջև ագրոարդյունաբերության բնագավառում համագործակցության մասին» միջգերատեսչական համաձայնագիրը, համաձայնություն տվեց ՀՀ կառավարության և Միջազգային ֆինանսական կորպորացիայի միջև ֆինանսական խորհրդատվական ծառայությունների համաձայնագրում փոփոխություններ կատարելու առաջարկությանը:
Նիստում հաստատվեցին նաև Լոռու, Գեղարքունիքի և Կոտայքի մարզերի մի շարք գյուղական համայնքների հողերի օգտագործման ժամանակավոր սխեմաները:
