երկուշաբթի, 19 մայիսի 2008
ՀՀ վարչապետ Տիգրան Սարգսյանն այսօր ընդունել է «Գազպրոմ» ԲԲԸ-ի վարչության նախագահ Ալեքսեյ Միլլերին:
Կողմերը գոհունակություն են հայտնել գազային ոլորտում երկու երկրների համագործակցության ներկայիս մակարդակից, ընդգծելով, որ նախորդ մի քանի տարիներին ձեռք բերված բոլոր պայմանավորվածությունները հաջողությամբ իրականացվել են, որի արդյունքում գազի սպառողների թիվը Հայաստանում զգալիորեն ավելացել է: Այսօր խնդիրը, ըստ նրանց, արդի իրողություններին համապատասխան, նշված ոլորտում փոխգործակցությունը շարունակելն ու զարգացնելն է: Հաշվի առնելով, որ առաջիկա երեք տարիների ընթացքում ազատականացվելու է Ռուսաստանում գազի գների ձևավորումը` հիմք ընդունելով գնագոյացման եվրոպական ստանդարտներ, Տիգրան Սարգսյանը և Ալեքսեյ Միլլերը միմյանց ներկայացրել են 2009թ. հունվարի 1-ից «Գազպրոմի» կողմից Հայաստանին մատակարարվելիք գազի գնագոյացման բանաձևերի վերաբերյալ իրենց տեսակետներն ու փաստարկները:
Հիմնական սկզբունքների թվում ՀՀ վարչապետն ընդգծել է, մասնավորապես, Հայաստանի տնտեսության մրցակցային հնարավորությունների ապահովումը, գազի գնի ձևավորման կանխատեսելիությունը, ինչպես նաև գնի փոփոխության սահուն ընթացքի համար պայմանների ստեղծումը:
Զրուցակիցները համակարծիք են եղել, որ Հայաստանում գազի նոր գնի շուրջ բանակցությունները շահագրգիռ կողմերի միջև պետք է ընթանան հնարավորին կարճ ժամկետում` գնագոյացման հանգամանքների թվում հաշվի առնելով նաև, որ «Գազպրոմ»-ը տիրապետում է «Հայռուսգազարդ» ընկերության բաժնետոմսերի մեծ մասին: Կողմերը վստահություն են հայտնել, որ քննարկվող խնդրի շուրջ վերջնական որոշում կընդունվի մոտ ժամանակներս:
Հանդիպման ժամանակ ՀՀ վարչապետը և «Գազպրոմ» ընկերության վարչության նախագահը քննարկել են «Հայռուսգազարդ» ընկերության կողմից բաժնետոմսերի առաջնային թողարկման ուղղությամբ համատեղ միջոցառումների իրականացման հնարավորությունը, ինչպես նաև երկկողմ ու տարածաշրջանային էներգետիկ համագործակցության այլ հարցեր:
