չորեքշաբթի, 21 մայիսի 2008
ՀՀ վարչապետ Տիգրան Սարգսյանն այսօր ընդունել է Բելառուսի Հանրապետության մշակույթի նախարար Վլադիմիր Մատվեյչուկին:
Ողջունելով հյուրին, վարչապետը նշել է, որ մշակույթն այն հիմքն է, որի վրա մեր երկու երկրների միջև գոյություն ունեցող բարեկամական հարաբերությունները զարգանում են ոչ միայն այդ, այլ նաև մնացած բոլոր ոլորտներում: Տիգրան Սարգսյանը վստահություն է հայտնել, որ պարոն Մատվեյչուկի այցը մեր երկիր և մշակութային երկկողմ համագործակցության եռամյա, հետաքրքիր միջոցառումներով հարուստ ծրագրի շուրջ ձեռք բերված պայմանավորվածությունները լուրջ խթան կհանդիսանան նաև երկու երկրների միջև ֆինանսատնտեսական փոխգործակցության համար:
Համաձայնելով ՀՀ վարչապետի հետ, Վլադիմիր Մատվեյչուկը ևս ընդգծել է, որ մշակույթը լայն հնարավորություններ է ընձեռում տարբեր ոլորտներում համագործակցությունը զարգացնելու համար: Կարևորելով Հայաստանի և Բելառուսի մշակույթի նախարարությունների միջև 2008-2010թթ. համագործակցության ծրագրի ստորագրումը, նա նշել է, որ դրանում ամրագրվում են այն գերակայությունները, որոնցով առաջիկա տարիներին Հայաստանի և Բելառուսի մշակույթները կներկայացվեն միմյանց երկրներում: Մասնավորապես, ըստ նրա, փոխադարձ պայմանավորվածությամբ, 2009թ. կանցկացվեն Բելառուսի Հանրապետության մշակույթի օրեր Հայաստանում, իսկ 2010թ.` ՀՀ մշակույթի օրեր Բելառուսում: Նախատեսված միջոցառումների թվում նախարարն առանձնացրել է ժողովրդական երգ ու պարի, ազգագրական համույթների փոխանակումները, կինոյի օրերի անցկացումը, թատրոնների փոխադարձ հյուրախաղերը, երիտասարդ նկարիչների ցուցահանդեսների կազմակերպումը, երկու երկրների գրադարանների միջև համագործակցության ստորագրումը և այլն: Նա նշել է, որ ՀՀ մշակույթի նախարարի հետ պայմանավորվել են առաջիկայում որոշակի նոր միջոցառումներով ևս լրացնել ծրագիրը:
Հանդիպման ժամանակ կողմերն անդրադարձել են նաև ՀՀ վարչապետ Տիգրան Սարգսյանի գլխավորած կառավարական պատվիրակության` վաղը կայանալիք այցին Բելառուսի Հանրապետության մայրաքաղաք Մինսկ` մայիսի 23-ին ԱՊՀ անդամ պետությունների կառավարությունների ղեկավարների խորհրդի նիստին մասնակցելու նպատակով:
