չորեքշաբթի, 11 սեպտեմբերի 2002
Այսօր ՀՀ վարչապետ Անդրանիկ Մարգարյանն ընդունել է «Գազպրոմ» ԲԲԸ-ի պատվիրակության ներկայացուցիչներին՝ ընկերության վարչության նախագահի տեղակալ Ալեքսանդր Ռյազանովի գլխավորությամբ: Պատվիրակությունը, որն Հայաստան է ժամանել մասնակցելու «Հայռուսգազարդ» ՓԲԸ-ի տնօրենների խորհրդի հերթական նիստին, ՀՀ վարչապետի հետ հանդիպման ընթացքում անդրադարձել է ընկերության գործունեությանը մեր երկրում, նախատեսվող ծրագրերին ու խնդիրներին, որոնք, ըստ պրն Ռյազանովի, առանց կառավարության աջակցության դժվար կլինի լուծել: Նշելով, որ այս տարի Հայաստանում գազի նվազ պահանջարկ է եղել, վարչապետն ընդգծել է, որ մեր տնտեսության համար անչափ կարևոր այդ էներգակրի սպառման ծավալների մեծացումը առաջիկայում անխուսափելի է՝ նկատի առնելով գազաֆիկացվող բնակավայրերի ավելացման ուղղությամբ ընթացող աշխատանքները, վերագործարկվող կամ հզորություններն ավելացնող ձեռնարկությունների թվի մեծացումը: Այս հարցում ավելի քան շահագրգիռ «Գազպրոմի» ներկայացուցիչների հետ քննարկվել են նաև ընկերությանը ինչպես Հայաստանի, այնպես էլ Ռուսաստանի կառավարության հնարավոր աջակցությանը վերաբերող հարցեր: Զրուցակիցները հույս են հայտնել, որ համեմատաբար էժան այդ էներգակրի սպառման շուկան մեր հանրապետությունում ընդլայնելով՝ առավելագույնս հաշվի կառնվեն և բնակչության, և պետբյուջեի շահերը:
