երեքշաբթի, 17 սեպտեմբերի 2002
Այսօր ՀՀ վարչապետ Անդրանիկ Մարգարյանն ընդունել է եռօրյա պաշտոնական այցով Երևան ժամանած Վրաստանի պաշտպանության նախարար, գեներալ-լեյտենանտ Դավիթ Թևզաձեին: Ընդգծելով տարածաշրջանում կայունության պահպանման անհրաժեշտությունը՝ վարչապետը նշել է, որ կան խնդիրներ, որոնց լուծումը, այնուհանդերձ, կախված է նրանից, թե ցանկանում ենք լուծել դրանք, թե ոչ. «Հայաստանը պատրաստ է իր հնարավորությունների սահմանում ամեն ինչ անել առկա հիմնախնդիրները լուծելու համար, որոնք անչափ կարևոր են նաև մեր երկրի համար», - ավելացրել է Անդրանիկ Մարգարյանը:
Հանդիպման ընթացքում անդրադարձ է եղել Ջավախքի խնդիրներին ևս: Վարչապետը, մտահոգություն հայտնելով այնտեղ բնակվող մեր հայրենակիցների ծանր սոցիալական վիճակի վերաբերյալ, կրկին հավաստել է Հայաստանի ցանկությունն ու պատրաստակամությունը՝ մասնակցելու այդ տարածաշրջանի սոցիալ-տնտեսական զարգացման ծրագրերի մշակմանն ու իրագործմանը: Անդրանիկ Մարգարյանը նշել է, որ ամիսներ առաջ այդ մասին խոսել է նաև Վրաստանի իր գործընկերոջ հետ՝ ընդգծելով, որ Հայաստանը չի կարող անտարբեր լինել Ջավախքի հայության ճակատագրի նկատմամբ:
Ստանալով վրացական պատվիրակության հավաստիացումները, որ իրենք նույնքան շահագրգիռ են իրենց քաղաքացիների կենսապայմանների բարելավման, նրանց համար աշխատատեղերի ստեղծման հարցում, ՀՀ վարչապետը նշել է, որ անհրաժեշտ է արդեն տևական ժամանակ երկուստեք արվող հավաստիացումներից անցնել գործի, արագացնել այդ ծրագրերի իրագործումը՝ այդպիսով կանխելով ավելորդ լարվածության առաջացումն ու զանազան շահարկումները: Անդրանիկ Մարգարյանը խոսել է նաև մեր կողմից ժամանակին առաջարկված՝ տարածաշրջանային անվտանգության համակարգի ստեղծման շուրջ լուրջ քննարկումներ, բանակցություններ սկսելու անհրաժեշտության մասին:
Նշելով, որ սա վերջին 10-11 տարիներին Վրաստանի պաշտպանության նախարարի առաջին այցն է Հայաստան, նախարար Թևզաձեն կարևորել է մեր երկրների միչև ինչպես երկկողմ, նույնպես և տարբեր կառույցների շրջանակում բազմակողմ համագործակցության զարգացումը: Համաձայնելով ՀՀ վարչապետի տեսակետին՝ նա ևս տարածաշրջանի կայունության, խաղաղության պահպանման համար անհրաժեշտ է համարել ջանքերի համադրումը: Անդրադառնալով Ջավախքից ռուսական ռազմակայանների դուրսբերման խնդրին, Վրաստանի պաշտպանության նախարարն ընդգծել է, որ իր երկրի տարածքում ոչ ռուսական, որ որևէ այլ երկրի ռազմական բազա չպետք է լինի: Զրույցի ընթացքում նա տեղեկացրել է նաև, որ նոյեմբերին Պրագայում նախատեսվող ՆԱՏՕ-ի գագաթաժողովում նախագահ Շևարդնաձեն հայտարարելու է ՆԱՏՕ-ին անդամակցելու իր երկրի ցանկության մասին:
