ուրբաթ, 27 սեպտեմբերի 2002
Այսօր ՀՀ վարչապետ Անդրանիկ Մարգարյանն ընդունել է ՌԴ Սարատովի նահանգապետ Դմիտրի Այացկովի գլխավորած պատվիրակությանը։ Հանդիպմանը, որին ներկա են եղել նաև ՀՀ կառավարության անդամներ, երկուստեք ընդգծվել է, որ Հայաստանի և Ռուսաստանի միջև ստորագրված Մեծ պայմանագրի շրջանակներում համագործակցության բավականին ներուժ կա, այդ թվում երկու երկրների առանձին վարչական տարածքների միջև։ Վարչապետ Անդրանիկ Մարգարյանն առաջարկել է ըստ առանձին ոլորտների ստեղծել համատեղ աշխատանքային խմբեր, դիտարկել փոխգործակցության բոլոր հնարավորությունները և անելիքները որոշակիացնելուց հետո հստակ ժամկետներ ամրագրել, որպեսզի աշխատանքը և դրա արդյունքը առարկայական լինեն։ Անդրանիկ Մարգարյանը նշել է նաև, որ դրա համար բոլոր անհրաժեշտ նախադրյալները կան. ստեղծված է իրավական դաշտը, կա երկկողմ ցանկություն և քաղաքական կամք։
Նահանգապետ Այացկովը, միանգամայն համամիտ լինելով վարչապետի մոտեցմանը, ավելացրել է, որ Հայաստանի և Ռուսաստանի նախագահների մակարդակով լուրջ հիմքեր են դրվել սերտ համագործակցության համար, որին լրացուցիչ խթան է հանդիսացել նաև նախագահ Ռ.Քոչարյանի այցը Սարատով։ Նա վարչապետին է փոխանցել Սարատովի մոտ 30 հազարանոց հայ համայնքի ջերմ ողջույնները և գոհունակությամբ խոսել մեր հայրենակիցների, իբրև իր երկրի օրինապահ քաղաքացիների, մասին։
Հանդիպման ընթացքում պատվիրակության անդամներին առաջարկվել է այցելել Երևանում օրերս բացված գյուղմթերքի ցուցահանդես, տեղում ծանոթանալ հայկական արտադրանքին և հետագայում էլ գործարար-համաժողովների, երկու երկրների գործարարների ակտիվ շփումների, ցուցահանդեսների միջոցով համագործակցությանը գործնական հարթություն տեղափոխել։ Հյուրերի կողմից առաջարկը սիրով ընդունվել է։
Վարչապետի հետ հանդիպումից հետո Սարատովի նահանգապետ պրն Այացկովի և ՀՀ գյուղնախարար Դավիթ Զադոյանի միջև կառավարությունում ստորագրվել է Սարատովի նահանգի և Հայաստանի կառավարության միջև երկկողմ համագործակցության մասին համաձայնագրի արձանագրությունը։
