հինգշաբթի, 26 հունիսի 2008
ՀՀ վարչապետ Տիգրան Սարգսյանն այսօր ընդունել է ԱՄՆ առևտրի դեպարտամենտի շուկաների հասանելիության և համապատասխանության հարցերով փոխքարտուղար Դեյվիդ Բոհիգյանին և նրա գլխավորած պատվիրակությանը:
Զրուցակիցները մտքեր են փոխանակել գործարար միջավայրի բարելավման, մտավոր սեփականության պաշտպանության խնդիրների, հարկային և մաքսային վարչարարության բարեփոխումների, ավելացված արժեքի հարկի գերավճարների վերադարձի և ընդհանուր գործարար միջավայրի բարելավմանն առնչվող այլ հարցերի վերաբերյալ: Վարչապետը նշել է, որ հիշյալ հարցերի շուրջ համագործակցությունը, ամերիկյան փորձն ու մոտեցումները կարող են բավականաչափ օգտակար լինել Հայաստանի համար` նպաստելով նաև հայ-ամերիկյան կապերի ամրապնդմանը:
Դեյվիդ Բոհիգյանը տպավորիչ է համարել Հայաստանի վերջին տարիների տնտեսական աճը և ընդգծել, որ իրենք շահագրգիռ են, որպեսզի այն կայուն և շարունակական լինի:
Վարչապետի խնդրանքով, ԱՄՆ առևտրի դեպարտամենտի շուկաների հասանելիության և համապատասխանության հարցերով փոխքարտուղարը ներկայացրել է օտարերկրյա ներդրումների խրախուսման ամերիկյան փորձը և Հայաստանում այդ ուղղությամբ հնարավոր աշխատանքը: Հանդիպմանն անդրադարձ է եղել նաև գիտության, մասնավորապես` ինովացիաների առևտրայնացման ոլորտում փորձի ուսումնասիրման, տարածաշրջանային զարգացման բնագավառում համագործակցության առաջարկներին և ս.թ. սեպտեմբերին նախատեսվող Հայաստան-Կալիֆոռնիա գործարար համաժողովի նպատակներին ու դրանց հասնելու համար ամերիկյան կողմի աջակցության հնարավորություններին: Նշվել է, որ համաժողովի քննարկման թեմաներն ընդգրկելու են զբոսաշրջության, գործարար ծառայությունների, դեղագործության և քիմիական արդյունաբերության ոլորտները:
Տիգրան Սարգսյանը զրուցակցին ներկայացրել է նաև մասնավոր-պետություն համագործակցության հիման վրա ստեղծված Ազգային մրցունակության խորհրդի գործունեության շրջանակները, կառավարության ծրագրային առաջնահերթությունները, իրականացվող բարեփոխումների ընթացքն ու առաջիկա անելիքները: ՀՀ կառավարության ղեկավարը և ԱՄՆ առևտրի դեպարտամենտի շուկաների հասանելիության և համապատասխանության հարցերով փոխքարտուղարը խոսել են «Հազարամյակի մարտահրավերներ» ծրագրի շրջանակներում Հայաստանում իրականացվող աշխատանքների և ծրագրի շարունակականության ապահովման նպատակով Հայաստանի կողմից իրականացվելիք քայլերի մասին:
