հինգշաբթի, 3 հուլիսի 2008
ՀՀ վարչապետ Տիգրան Սարգսյանը հուլիսի 4-ին աշխատանքային այցով կմեկնի ԼՂՀ: Վարչապետի գլխավորած պատվիրակության կազմում են ՀՀ գյուղատնտեսության, էներգետիկայի և բնական պաշարների, աշխատանքի և սոցիալական հարցերի, կրթության և գիտության, մշակույթի նախարարները: Այցի շրջանակներում Տիգրան Սարգսյանը հանդիպումներ կունենա ԼՂՀ նախագահ Բակո Սահակյանի և վարչապետ Արայիկ Հարությունյանի հետ, կմասնակցի ՀՀ և ԼՂՀ կառավարությունների համատեղ նիստին, որտեղ կամփոփվեն նախարարների միջև մինչ այդ փոխադարձ հետաքրքրություն ներկայացնող հարցերի շուրջ տեղի ունեցած քննարկումների արդյունքները: ՀՀ կառավարության ղեկավարն իր գործընկերոջ և համատեղ նիստի մասնակիցների հետ կայցելի նաև արցախյան հերոսամարտի զոհերի հուշարձան` հարգանքի տուրք մատուցելու զոհվածների հիշատակին:
Այցի շրջանակներում, ՀՀ վարչապետը կայցելի նաև Շուշի, որտեղ «Շուշիի վերածնունդ» հիմնադրամի «Արվեստի, արհեստների և զբոսաշրջության» կենտրոնում կներկայացվի մինչ այժմ հիմնադրամի կատարած աշխատանքը և կքննարկվեն հիմնադրամի գործունեության հետ կապված ռազմավարական խնդիրներ: Շուշիում ՀՀ կառավարության ղեկավարը և նրան ուղեկցող պատվիրակության անդամները նաև կշրջեն քաղաքում` կծանոթանան Շուշիի ենթակառուցվածքների վիճակին, ընթացիկ շինարարական, վերակառուցման ծրագրերին:
Վարչապետի հրավերով, այցի օրերին, ԼՂՀ-ում կլինեն նաև «Ապագան քոնն է» բարեգործական սոցիալական հասարակական կազմակերպության կողմից իրականացվող «Սովորենք ժողովրդավարություն» ծրագրի մասնակից շուրջ երեք տասնյակ երեխաներ` հանրապետության տարբեր մարզերից:
ՀՀ վարչապետի գլխավորած պատվիրակությունը կվերադառնա հուլիսի 6-ին:
