ուրբաթ, 4 հոկտեմբերի 2002
Այսօր ՀՀ վարչապետ Անդրանիկ Մարգարյանն ընդունել է Եվրոպայի խորհրդի մարդու իրավունքների հարցերով հանձնակատար Ալվարես Խիլ Ռոբլեսին և Մարդու իրավունքների եվրոպական դատարանի նախագահ Լյուսիուս Վայլդհաբերին: Քննարկվել են մեր երկրում մարդու իրավունքների պաշտպանության ուղղությամբ իրականացված միջոցառումների և առաջիկա անելիքների հետ կապված հարցեր: Նշվել է, որ ցանկացած երկրում այս ոլորտի բարեփոխումների արդյունքները որոշակի ժամանակ են պահանջում, սակայն կարևոր է դրանց անհրաժեշտության գիտակցումն ու այդ ուղղությամբ ջանքերի գործադրումը: Նշելով, որ Հայաստանում մարդու իրավունքների պաշտպանության ոլորտում առաջընթաց կա, պրն Ռոբլեսն ավելացրել է, որ եվրոպական ընտանիք հրավիրված Հայաստանը այդպիսով լրացուցիչ հնարավորություններ է ստացել այդ ոլորտի առաջընթացը խթանելու համար: Նա օրինակ է բերել եվրոպական դատարաններ ազատ այցելելու մեր երկրի հնարավորությունը և ընդգծել, որ ուրախ կլինի իր այցով ևս օգտակար լինել սկսված գործընթացի հաջողությանը նպաստելուն:
Հանդիպման ընթացքում վարչապետը կարևորել է մարդու իրավունքների պաշտպանության ինստիտուտի լիարժեք կայացմանը նպաստող օրենսդրական դաշտի ձևավորմանը միտված օրենքների ընդունումից բացի, օրենքի գերակայության ընդունման հարցում մարդկանց հոգեբանության փոփոխությունը: Մինչ այդ, նա կարևորել է ոլորտի բարեփոխումներին հասարակության լայն շերտերի, հասարակական կազմակերպությունների, զանգվածային լրատվամիջոցների, դատական համակարգի ակտիվ մասնակցությունն ու օժանդակությունը:
