ուրբաթ, 18 հուլիսի 2008
ՀՀ վարչապետ Տիգրան Սարգսյանն այսօր ընդունել է ինտելեկտուալ խաղերի Հարավային Կովկասի 10-րդ առաջնությանը մասնակցած հայկական երեք ուժեղագույն թիմերի ներկայացուցիչներին:
Հայ գիտակները ՀՀ կառավարության ղեկավարին ներկայացրել են Բաթումիում, Հայաստանի, Վրաստանի և Ադրբեջանի թիմերի մասնակցությամբ, կայացած ինտելեկտուալ խաղերի առաջնությունում իրենց հաջողությունները, նշելով, որ նախկինում ևս առաջնության տարբեր մրցաձևերում ունեցել են հաղթանակներ` արժանանալով չեմպիոնի կոչման: Վարչապետը խոստումնալից այդ հաջողությունների կապակցությամբ շնորհավորել է հանդիպման մասնակիցներին, կարևորելով ինտելեկտուալ խաղերի նկատմամբ հասարակության մեջ և հատկապես նրա մի հատվածի` երիտասարդության շրջանում հետաքրքրության մեծացումը, որն զգալիորեն կնպաստի նրանց գիտելիքների, մտածողության զարգացմանը, ինֆորմացիայի հետ աշխատելու կարողության ավելացմանը: Տիգրան Սարգսյանն ընդգծել է, որ հայկական թիմերի հաղթանակները` մեր երկրում խաղը զանգվածային դարձնելու գործում չափազանց կարևոր են, իբրև օրինակ ներկայացնելով Տիգրան Պետրոսյանի շախմատային հաղթանակները, որոնք ոգևորում և վարակիչ էին դառնում նրա բոլոր երկրպագուների և առհասարակ, հայ հանրության համար:
Վարչապետը, հայ գիտակներին խոստացել է պետական աջակցություն ապահովել հետագա ինտելեկտուալ խաղերին, այդ թվում այս տարվա Կալինինգրադում կայանալիք «Ի՞նչ, որտե՞ղ, ե՞րբ» խաղի աշխարհի հերթական առաջնությանը պատշաճ մասնակցության համար: Հանդիպման մասնակիցները շնորհակալություն են հայտնել ՀՀ կառավարության ղեկավարին` մինչ այժմ ցուցաբերած մասնակցության և այն շարունակական դարձնելու պատրաստակամության համար:
