չորեքշաբթի, 30 հուլիսի 2008
Հայ-հրեական բարեկամական հարաբերությունների ամրապնդման ու զարգացման գործում ներդրած ավանդի համար «Հայաստանի հրեական համայնք» հասարակական կազմակերպության նախագահ Ռիմա Վարժապետյանը ՀՀ վարչապետ Տիգրան Սարգսյանի որոշմամբ, պարգևատրվել է Հայաստանի Հանրապետության վարչապետի հուշամեդալով:
Այսօր ՀՀ կառավարությունում վարչապետը պարգևը հանձնել է տիկին Ռ. Վարժապետյանին` շնորհակալություն հայտնելով այն ակտիվ հասարակական գործունեության համար, որ նա ծավալում է Հայաստանում ազգային փոքրամասնություններից մեկի` հրեական համայնքի կյանքի կազմակերպման, համայնքի խնդիրների լուծման գործում ՀՀ իշխանությունների հետ մշտական համագործակցության և հայ-հրեական հարաբերությունների սերտացման գործում.
«Ձեր նվիրվածությունը գործին մեզ համար տեսանելի և խրախուսելի է», - ասել է վարչապետը, կազմակերպության ղեկավարից հետաքրքրվելով համայնքի ներկայիս խնդիրների ու կազմակերպության ծրագրերի մասին:
«Հայաստանի հրեական համայնք» ՀԿ-ի ղեկավարը շնորհակալություն է հայտնել գնահատանքի ու Հայաստանում հրեական համայնքի նկատմամբ ցուցաբերվող ուշադրության համար և նշել, որ սա ևս մեկ առիթ է Հայաստանը աշխարհին լավագույնս ներկայացնելու, խոսելու հայ-հրեական բարեկամության մասին. «Այն, ինչ արել եմ` արել եմ անկեղծ նվիրումով և պատրաստ եմ ավելի մեծ ջանադրությամբ շարունակելու իմ գործունեությունը: Հայաստանը բոլոր նախադրյալներն ունի հզոր ու բարեկեցիկ երկիր դառնալու, և մեր համատեղ ջանքերը, վստահ եմ, զգալիորեն կնպաստեն այդ գործին», - ասել է Ռիմա Վարժապետյանը, ՀՀ կառավարության ղեկավարի հետ հանդիպման առիթից օգտվելով, շնորհակալություն հայտնել նաև 2007թ. ՀՀ կառավարության կողմից Վայոց Ձորի Եղեգնաձորի տարածաշրջանի Եղեգիս գյուղում գտնվող 14-17-րդ դարերի հրեական հուշարձանի վերականգնողական աշխատանքների նպատակով 21 մլն դրամ հատկացնելու համար:
