չորեքշաբթի, 17 սեպտեմբերի 2008
ՀՀ վարչապետ Տիգրան Սարգսյանն այսօր ընդունել է Համաշխարհային բանկի կրթական ծրագրերի առաքելությանը` ՀԲ Հայաստանի գրասենյակի տնօրեն Արիստոմենե Վարուդակիսի գլխավորությամբ:
ՀԲ Հայաստանի գրասենյակի տնօրենը և կրթության ծրագրերի ղեկավար Խուան Մանուել Մորենոն ՀՀ կառավարության ղեկավարի հետ խոսել են կրթական ոլորտում ՀԲ-ի կողմից մինչ այսօր իրականացված և առաջիկա 4 տարիներին բանկի կողմից Երկրին օժանդակության ռազմավարության (ԵՕՌ) շրջանակներում նախատեսվող կրթական ծրագրերի մասին: Բանկի առաքելության անդամները ՀՀ վարչապետից հետաքրքրվել են նաև հիշյալ ոլորտում ՀՀ կառավարություն ռազմավարության ներկայացված ծրագրի վերաբերյալ նկատառումների մասին, քննարկել` առաջիկա տարիների նախապատրաստական աշխատանքների պատկերացումները: Բանկի ներկայացուցիչների հավաստմամբ, ռազմավարությունը կկենտրոնանա հատկապես բարձրագույն կրթության վրա, սակայն ընդհանուր նպատակը` կրթական որակի բարձրացումն է` ե՛ւ նախադպրոցական, ե՛ւ հանրակրթության ոլորտում: ՀԲ-ն նախատեսում է նորագույն տեխնոլոգիաների կիրառմամբ, բարձրագույն դպրոցում կառավարության ծրագրերին օժանդակության, անհրաժեշտ ներդրումների միջոցով բարելավել իրավիճակը` անդրադառնալով ոլորտի մինչ այժմ տեսադաշտից դուրս մնացած բացերին ևս:
Վարչապետն ընդգծել է, որ կրթական ոլորտը ՀՀ կառավարության ծրագրով նախանշված գերակայությունների շարքում է, և այսօր չափազանց կարևորվում է կրթական համակարգի արդկականացման, կրթության որակի բարձրացման խնդիրը: Նշելով, որ համակարգի ներկայիս վիճակը ՀՀ կառավարությանը չի բավարարում, Տիգրան Սարգսյանը կարևորել է ճիշտ կառավարման համակարգի ներդրումը, որպեսզի ոլորտում նախատեսվող ծրագրերը չմնան սոսկ թղթի վրա. «Որակի չափանիշները կարևոր է ոչ միայն մշակել, ներդնել, այլ նաև` պատշաճ վերահսկել և խստապահանջ լինել կարևորագույն այս ոլորտի նկատմամբ»,- ասել է վարչապետը:
ՀՀ կառավարության ղեկավարը նշել է նաև, որ Լիսաբոնյան հռչակագիրը միանգամայն համընկնում է ՀՀ կառավարության պատկերացումներին, ըստ որի` կարևորվում է համալսարանների վրա հիմված հասարակության ձևավորումը: ՀՀ կրթության նախարարն իր հերթին վստահեցրել է, որ նախարարությունը հաստատակամ է Բոլոնյան գործընթացի բոլոր պահանջները բավարարելու հարցում և այս առումով, բուհերին հնարավորինս աջակցելու խնդիր է տեսնում:
Հանդիպման ավարտին, ՀՀ վարչապետը շնորհակալություն է հայտնել ՀԲ-ին` շահագրգիռ համագործակցության և կրթական ոլորտում կառավարության ծրագրերին օժանդակության պատրաստակամության համար:
