ուրբաթ, 19 սեպտեմբերի 2008
ՀՀ վարչապետ Տիգրան Սարգսյանն այսօր ընդունել է «Ռուսական երկաթուղիներ» ԲԲԸ-ի նախագահ Վլադիմիր Յակունինին: Քննարկվել են Հայաստանի տնտեսության զարգացմանը զուգընթաց` երկաթուղու գործունեության ընդլայնմանն ու զարգացմանն առնչվող հարցեր, ինչպես նաև «Ռուսական երկաթուղիներ» ԲԲԸ-ի կողմից ստեղծված «Հարավկովկասյան երկաթուղի» ՓԲԸ-ին հայկական երկաթուղու համակարգը փոխանցելու վերաբերյալ կոնցեսիոն պայմանագրից բխող խնդիրներ: Վարչապետն ընդգծել է, որ կան երկաթուղու ղեկավարության հետ քննարկվելիք` մեր տնտեսության համար կարևորագույն բավականաչափ հարցեր ու որոշակի նախագծեր, որոնց մասին խոսել է նաև ՀՀ նախագահը: Դրանք, ըստ ՀՀ կառավարության ղեկավարի, կարող են նաև տարածաշրջանում կայունությանը նպաստող լուրջ նախադրյալ հանդիսանալ: Տիգրան Սարգսյանն ասել է, որ ս.թ. սեպտեմբերի սկզբին իր մոտ տեղի ունեցած խորհրդակցության ժամանակ հանգամանորեն քննարկվել է կոնցեսիոն պայմանագրով ստանձնած պարտավորությունների կատարման ընթացքը և տրվել են հանձնարարականներ, որոնց համաձայն, նախատեսված աշխատանքներն օպերատիվ կարգով կլուծվեն, իսկ ընթացքի մասին պարբերաբար կզեկուցվի վարչապետին:
Վլադիմիր Յակունինը շնորհակալություն է հայտնել ՀՀ կառավարության ղեկավարին և ՀՀ նախագահին` երկրի տնտեսության համար երկաթուղու կարևորութունը ըստ պատշաճի գնահատելու և ուշադրության կենտրոնում պահելու համար, ընդգծելով, որ ինքը ևս խստապահանջ է լինելու պայմանագրային պարտավորությունների կատարման, Հայաստանում այդ ենթակառուցվածքն ամբողջ կարողությամբ գործարկելու հարցում, ինչը Հայաստանի տնտեսության առջև այսօր ծառացած բազմաթիվ խմդիրներ կլուծի:
ՀՀ վարչապետ Տիգրան Սարգսյանը վստահեցրել է, որ այդ աշխատանքներին կլինի ՀՀ կառավարության մշտական աջակցությունը` համատեղ ջանքերով առկա խնդիրները լուծելու և այնուհետ զարգացման ծրագրերով առաջ շարժվելու նպատակով:
