շաբաթ, 20 սեպտեմբերի 2008
ՀՀ վարչապետ Տիգրան Սարգսյանի ուղերձը Հայաստանի Հանրապետության Անկախության 17-րդ տարեդարձի կապակցությամբ
Սիրելի հայրենակիցներ,
Շնորհավորում եմ ձեզ Հայաստանի Հանրապետության Անկախության տոնի առթիվ: Ավելի քան մեկուկես տասնամյակ առաջ կատարելով իր պատմական ընտրությունը` մեր ժողովուրդը քաջ գիտակցում էր ազատ ու ինքնիշխան, ժողովրդավարական պետության կառուցման ճանապարհին սպասվող դժվարություններն ու խոչընդոտները, բայց նաև համոզված էր, որ այդ ամենը հնարավոր է հաղթահարել ազգային համախմբվածության, Անկախության հռչակագրում ամրագրված նպատակներին ու սկզբունքներին հավատարիմ լինելու, անկոտրում կամքի ու տոկունության շնորհիվ: Անցած տարիները դրա խոսուն վկայությունն են: Վստահ եմ, որ Հայրենիքի, Արցախի և Սփյուռքի հայության համախմբմամբ ի զորու կլինենք դիմագրավել նաև այսօրվա արագ փոփոխվող աշխարհում առկա նոր մարտահրավերները, մեր երկիրն ու ժողովրդին զերծ պահել բոլոր հնարավոր վտանգներից, վճռականորեն շարունակել իրականացվող բարեփոխումների գործընթացը: Մենք բավարար կամք և ներուժ ունենք միասնական ջանքերով պահպանելու անցած դժվարին ճանապարհի ձեռքբերումները, դրանք ամրագրելու նոր հաջողություններով` սերունդներին կայուն ու բարեկեցիկ Հայաստան ժառանգելու համար:
Նշելով Անկախության տոնը, մենք այսօր արժանին ենք մատուցում նաև մեր ազգի բոլոր այն հերոսներին, ովքեր իրենց կյանքը նվիրաբերեցին այդ սուրբ պայքարին, ուղի հարթեցին Անկախության անկասելի երթի համար:
Սիրելի հայրենակիցներ, բոլորիս համար նվիրական այս տոնի կապակցությամբ մաղթում եմ հարատև խաղաղություն և անսասան հավատ` մեր պետության ու համայն հայության վաղվա լուսավոր օրվա նկատմամբ:
