երկուշաբթի, 29 սեպտեմբերի 2008
ՀՀ վարչապետ Տիգրան Սարգսյանի որոշմամբ, ակնառու հայրենանվեր գործունեության և բարեգործության բնագավառում ունեցած վաստակի համար, բարերար Ջուլիան Հովսեփյանը պարգևատրվել է ՀՀ վարչապետի հուշամեդալով: Պարգևը հայ բարերարին այսօր հանձնել է ՀՀ վարչապետը` ՀՀ կառավարությունում նրա հետ ունեցած հանդիպման ժամանակ: Տիգրան Սարգսյանը շնորհակալություն է հայտնել հայրենիքում մշակույթի զարգացմանը հնարավորինս նպաստելուն միտված հայ բարերարների լավագույն ավանդույթները շարունակելու` Ջուլիան Հովսեփյանի ջանքերի համար, մասնավորապես, Հայաստանի ազգային պատկերասրահին նրա արժեքավոր նվիրատվության համար: Վարչապետն ընդգծել է, որ մշակույթի նկատմամբ նման վերաբերմունքը նաև վկայում է մեր ժողովրդի որակական հատկանիշների մասին:
Բարերար Ջուլիան Հովսեփյանը երախտագիտություն է հայտնել պարգևի և գնահատանքի խոսքերի համար, նշելով, որ պատրաստվում է իր հարուստ հավաքածուից ևս որոշ արժեքավոր կտավներ առաջիկայում նվիրել Հայաստանի ազգային պատկերասրահին:
