երեքշաբթի, 30 սեպտեմբերի 2008
Այսօր ՀՀ վարչապետ Տիգրան Սարգսյանն ընդունել է Ֆլետչերի իրավաբանության և դիվանագիտության դպրոցի, ինչպես նաև «Տավիտյան» հիմնադրամի ներկայացուցիչներին:
Բարձր գնահատելով նշված կազմակերպությունների աշխատանքը և շնորհակալություն հայտնելով Հայաստանի կրթական ոլորտն ուշադրության կենտրոնում պահելու համար` ՀՀ վարչապետը քննարկել է համագործակցության հետագա ուղղությունները: Որակյալ կրթության ապահովման տեսանկյունից, Տիգրան Սարգսյանը չափազանց կարևոր է համարել կրթական համակարգի բարեփոխումները: ՀՀ կառավարության ղեկավարը տեղեկացրել է, որ ՀՀ նախագահ Սերժ Սարգսյանի նախաձեռնությամբ Հայաստանի Հանրապետությունը պատրաստ է ֆինանսավորել բոլոր այն ուսանողների կրթական ծախսերը, ովքեր կընդունվեն ամենաբարձր վարկանիշն ունեցող արտասահմանյան բուհերը: Նա նշել է, որ ուսանողների ընտրության և ուսման բնագավառի որոշման հարցում որևէ նախապայման չկա, կարևորը` միջազգային բարձր հեղինակություն վայելող ուսումնական հաստատություն ընդունվելն է: ՀՀ վարչապետը նշել է, որ ընդունված ուսանողների թիվը կարող է չարդարացնել սպասելիքները, սակայն կարևոր է գիտակցել, որ «ծանոթ-բարեկամի» միջոցով աշխատանքի ընդունվելու կարծրատիպն այլևս անընդունելի է: «Բոլոր բնագավառներում անհրաժեշտ են որակյալ մասնագետներ, և պետությունը պատրաստ է աջակցել նրանց, ովքեր իրենց գիտելիքներով օգտակար կլինեն հայրենիքին»,- ընդգծել է Տիգրան Սարգսյանը:
«Տավիտյան» հիմնադրամի նախագահ Ասո Տավիտյանը և նրա գործընկերները պատրաստակամություն են հայտնել` շարունակել 6-ամսյա կրթական ծրագրերը տարբեր բնագավառներում, ինչպես նաև առաջիկայում հանդես գալ համագործակցության նոր գաղափարներով:
