ուրբաթ, 3 հոկտեմբերի 2008
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Ս. Տեր-Սիմոնյանը:
Հանձնաժողովը քննարկել է 11 բարեգործական ծրագիր: Մասնավորապես, քննարկվել և հաստատվել են` ՀՀ բնապահպանության նախարարության կողմից իրականացվող «Աջակցություն Խոր Վիրապ պետական արգելավայրի կառավարմանը» և «Աջակցություն «Դիլիջան» ազգային պարկում էկոկրթության և էկոտուրիզմի զարգացմանը», «Հայաստան» համահայկական հիմնադրամի կողմից իրականացվող` «ՀՀ Գեղարքունիքի մարզի Խաչաղբյուր գյուղի դպրոցի մասնաշենքի ջեռուցման նախագծում», «Լեռնային Ղարաբաղի Հանրապետության առողջապահության համակարգի համար շտապ օգնության ավտոմեքենաների ներմուծում», «Նորք» ինֆեկցիոն կլինիկական հիվանդանոցի «Ա» մասնաշենքի տանիքի վերանորոգում» և «Հեռուստամարաթոն-2008» համերգների կազմակերպում» ծրագրերը:
ՀՀ գիտությունների ազգային ակադեմիայի «Հիմնարար գիտական գրադարան» ՊՈԱԿ-ի կողմից իրականացվող ծրագրի նպատակն է հնատիպ և հազվագյուտ գրքերի թվայնացումը, իսկ «Մատենադարան» հիմնադրամի կողմից իրականացվող ծրագրի նպատակը` Մատենադարանի նոր մասնաշենքի կառուցումը:
Նիստում հաստատվել են նաև Մայր Աթոռ Սուրբ Էջմիածնի կողմից իրականացվող «Մայր Աթոռ Սուրբ Էջմիածնի Գրատների համակարգի կահույքի պատրաստման և տեղադրման աշխատանքների իրականացում», «Կամրջակ» սոցիալ-բարեգործական հասարակական կազմակերպության կողմից իրականացվող «Կոտայքի մարզի Գառնի գյուղի խմելու ջրի ջրագծի կառուցում», «Գևորգ Ա. Մոմջյան» բարեգործական հիմնադրամի կողմից իրականացվող` «Հայ և արաբ ժողովուրդների բարեկամության հուշարձանի կառուցում» ծրագրերը:
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման ծրագրեր:
