երկուշաբթի, 13 հոկտեմբերի 2008
ՀՀ վարչապետ Տիգրան Սարգսյանի աշխատանքային այցը Վաշինգտոնում շարունակվեց Համաշխարհային բանկի և Արժույթի միջազգային հիմնադրամի տարեկան համաժողովի նիստի բացման արարողությամբ: Միջոցառման առանցքում էր ֆինանսական ճգնաժամը, որի մասին երեք շաբաթ է, ինչ խոսում են ամերիկյան և միջազգային փորձագետներն ու ԶԼՄ-ները:
Արժույթի միջազգային հիմնադրամի գործադիր տնօրեն Դոմինիկ Ստրաուս Քանի խոսքով, ֆինանսական ճգնաժամը չպետք է հանգեցնի զարգացող երկրներին հատկացվող օժանդակության կրճատման: Այս կարծիքը դարձավ պատվիրակությունների միջև քննարկումների և տարակարծությունների առարկա:
Այնուհետև ՀՀ վարչապետի գլխավորած պատվիրակությունն այցելեց Վաշինգտոնում Հայաստանի դեսպանատուն, ուր հանդիպեց Ամերիկայի Հայկական համագումարի ղեկավարների և Ամերիկա-հայկական հասարակական հարաբերությունների կոմիտեի USAPAC ղեկավարների հետ: Վերջինս ընդամենը երկու տարի է գործունեություն ծավալում այլ հայկական լոբբիստական կազմակերպությունների հետ զուգահեռ, սակայն կառույցի ղեկավար Ռոս Վարթյանի խոսքով, այն դարձել է խոշորագույն հայկական միություններից մեկը ԱՄՆ-ում: Հանդիպման ընթացքում շոշափվեցին Հայաստան-Սփյուռք փոխհարաբերությունների և հայ-թուրքական հարաբերությունների թեմաները, ինչպես նաև ֆինանսական ճգնաժամի հարցը:
ՀՀ վարչապետ Տիգրան Սարգսյանը նաև հանդիպեց ամերիկահայ համայնքի ներկայացուցիչների հետ:
