հինգշաբթի, 16 հոկտեմբերի 2008
Այսօր ՀՀ վարչապետ Տիգրան Սարգսյանն ընդունել է Եվրոպական հանձնաժողովի արտաքին հարաբերությունների գլխավոր տնօրինության ղեկավար Էնեկո Լանդաբուրուին և նրա գլխավորած պատվիրակությունը, որի կազմում էին եվրոպական կառույցի հայաստանյան պատասխանատու Սեզարի Բարդինսկին, Հարավային Կովկասի և կենտրոնական Ասիայի վարչության պետ Վիկտոր Անդրես Մալդոնադոն և ՀՀ-ում Եվրոպական հանձնաժողովի պատվիրակության ղեկավար Ռաուլ Լուցենբերգերը:
Էնեկո Լանդաբուրուի խոսքով, ԵՄ և Հարավային Կովկասի երկրները, մասնավորապես Հայաստանը, թևակոխել են համագործակցության նոր ժամանակաշրջան: Նա առաջարկեց շարունակել ոչ միայն երկկողմ հարաբերությունները, այլև ձևավորել բազմակողմ գործակցության նոր հիմքեր: Պարոն Լանդաբուրուն վստահություն հայտնեց, որ ԵՄ և ՀՀ կառավարությունը կիսում են նույն արժեքները, և կայունություն, ժողովրդավարություն ու առաջընթաց արձանագրելու նպատակով անհրաժեշտ է խորացնել և արագացնել երկկողմ հարաբերությունների նոր մակարդակին անցնելու գործընթացը:
ՀՀ գործադիր իշխանության ղեկավարը հաստատակամություն հայտնեց շարունակել ոչ միայն նախկինում ձեռք բերված պայմանավորվածությունների իրականացումը, այլև նոր առաջարկներին հավանություն տվեց: Էնեկո Լանդաբուրուի խոսքով, ԵՄ ցանկանում է լինել Հայաստանի և Հարավային Կովկասի երկրների արդիականացմանը նպաստող կողմ, երկխոսություն հաստատել Արևմտյան Եվրոպայի և Հարավային Կովկասի երկրների հետ, ԵՄ կարող է ավելի կարևոր դեր ստանձնել տարածաշրջանի համար, քանի որ դա կխթանի ժողովրդավարությանը:
Կողմերը քննարկեցին նաև Վրաստան- Ռուսաստան հայտնի գործողությունների ընթացքում Հայաստանի տնտեսության վրա բացասական անդրադարձը, Համաշխարհային բանկի և Արժույթի միջազգային հիմնադրամի հետ ձեռք բերված որոշ պայմանավորվածությունների առումով նաև ԵՄ օժանդակության հարցը, ինչպես նաև տարածաշրջանային անվտանգության խնդիրը:
