ուրբաթ, 31 հոկտեմբերի 2008
ՀՀ վարչապետ Տիգրան Սարգսյանն այսօր ընդունել է «Մայքրոսոֆթ» կորպորացիայի Կենտրոնական և Արևելյան Եվրոպայի տարածաշրջանային փոխնախագահ Վահե Թորոսյանին:
Վարչապետը շնորհակալություն է հայտնել Վահե Թորոսյանին` ՀՀ կառավարության և «Մայքրոսոֆթ» կորպորացիայի միջև արդյունավետ և շարունակական համագործակցության ուղղությամբ գործադրած ջանքերի համար: Նա նշել է, որ ՀՀ կառավարությունը կարևորում է 2007թ. հունվարին Էդինբուրգում ՀՀ կառավարության և «Մայքրոսոֆթ» կորպորացիայի միջև տեղեկատվական տեխնոլոգիաների (ՏՏ) ոլորտում համագործակցության վերաբերյալ կնքված պայմանագիրը և պատրաստակամ է ապահովել այդ փաստաթղթում ամրագրված դրույթների իրականացումը: «Ուրախ եմ, որ սկսել ենք համագործակցությունը, և այսօր արդեն ժամանակն է քննարկելու մեր վաղվա ծրագրերը, պայմաններ ստեղծելու մոտ ապագայում դրանք իրականություն դարձնելու համար», - ասել է ՀՀ վարչապետը: Նա նշել է, որ ՀՀ կառավարությունը տեղեկատվական տեխնոլոգիաների ոլորտը համարում է իր ծրագրային առաջնահերթություններից մեկը և «Մայքրոսոֆթի» հետ համագործակցությունը դիտարկում է այդ տեսանկյունից` համոզված, որ դա կօգնի Հայաստանը դարձնելու տեղեկատվական տեխնոլոգիաների ոլորտում իրապես զարգացած երկիր:
Այնուհետ կողմերը քննարկել են հիշյալ պայմանագրի շրջանակներում իրականացվելիք առաջիկա անելիքները: Տիգրան Սարգսյանն ընդգծել է, մասնավորապես, Հայաստանում «Մայքրոսոֆթ ինովացիոն կենտրոնի» (MIC) հիմնադրման կարևորությունը, ինչը, ըստ նրա, լուրջ խթան կհանդիսանա մեր երկրում ՏՏ ոլորտի զարգացման համար: ՀՀ վարչապետը կարևոր է համարել նաև էլեկտրոնային կառավարության համակարգերի ներդրման ուղղությամբ համագործակցության ծրագիրը:
«Մայքրոսոֆթի» փոխնախագահը` խոսելով նշված և այլ ծրագրերի մասին, հանգամանորեն ներկայացրել է դրանց շուրջ փոխգործակցության ընթացքը, զարգացման միտումներն ու սպասվող արդյունքները:
Հանդիպման ավարտին կողմերը մեկ անգամ ևս հավաստել են համագործակցությունը շարունակելու և զարգացնելու իրենց պատրաստակամությունը:
