ուրբաթ, 28 նոյեմբերի 2008
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Ս. Տեր-Սիմոնյանը:
Հանձնաժողովը քննարկել է 4 բարեգործական ծրագիր: Մասնավորապես, քննարկվել և հաստատվել են «Հայաստան» համահայկական հիմնադրամի կողմից իրականացվող` «Հայաստանի Հանրապետության Տավուշի մարզի Ակնաղբյուր գյուղի ոռոգման համակարգի վերակառուցում» և «Լեռնային Ղարաբաղի Հանրապետության Մարտունու շրջանի Թաղավարդ գյուղի ջրամատակարարման ցանցերի վերակառուցման նախագծում», «Օթևան» երիտասարդ մարդկանց քրիստոնեական ասոցիացիա հասարակական կազմակերպության կողմից 2008 թվականին իրականացվող «Երևան քաղաքի Նոր Նորք համայնքի նախկին ուսանողական հանրակացարանի առաջին մասնաշենքի վերանորոգում» ծրագրերը:
«Ամերիկայի հայկական համագումար» կորպորացիայի Երևանի մասնաճյուղի կողմից իրականացվող ծրագրի նպատակն է Հանրապետության 37 հասցեում գտնվող հուշարձան-շենքի վերակառուցումը (շենքը բացառապես ծառայելու է ազգանվեր և հանրօգուտ բարեգործական նոր ծրագրերի մշակմանն ու իրագործմանը):
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման ծրագրեր:
