երեքշաբթի, 27 հունվարի 2009
ՀՀ վարչապետ Տիգրան Սարգսյանի շնորհավորական ուղերձը Բանակի օրվա առթիվ
Սիրելի հայրենակիցներ, Հայոց բանակի հրամանատարներ և զինվորներ, ջերմորեն շնորհավորում եմ ձեզ Բանակի օրվա առթիվ։
Հայոց բանակը մեր անկախ պետականության ամենակարևոր նվաճումներից է։ Հայկական զինված ուժերի մարտական ոգին, ռազմագիտական հմտությունները, հայրենասիրությունը խարսխված են դարավոր պատմության ընթացքում մեր ժողովրդի ցուցաբերած ազատատենչության, մեր զորավարների անցած փառավոր ուղու և փորձի, ավելի ուշ` արցախյան ազատամարտի բովում թրծված մարտիկների սխրանքի ու հայրենասիրության վրա։ Այսօր էլ, երբ աշխարհը կանգնած է խաղաղությանն սպառնացող նոր մարտահրավերներին դիմակայելու լրջագույն խնդիրների առջև, հայոց բանակը ոչ միայն հուսալիորեն պաշտպանում է մեր պետության սահմանները, այլև իր մասնակցությունն է բերում միջազգային խաղաղապահ գործընթացներին` պատվով կատարելով այդ առաքելությունը։
Վստահ եմ, որ այսուհետ ևս շարունակելու ենք մեր անկախ պետականության հետագա զորացման ու մեր ժողովրդի խաղաղ և ապահով կյանքի գլխավոր երաշխիքներից մեկը համարվող հայոց բանակի նկատմամբ համազգային հոգատարություն ցուցաբերել` բանակաշինության խնդիրները մշտապես պահելով պետության ուշադրության կենտրոնում։
Կրկին շնորհավորելով բոլորիս` Հայոց փառապանծ բանակի կազմավորման 17-ամյակի առթիվ, մաղթում եմ խաղաղություն և բարօրություն։
