շաբաթ, 31 հունվարի 2009
ՀՀ վարչապետ Տիգրան Սարգսյանն այսօր այցելել է «Հայկական ճարտարապետությունն ուսումնասիրող» հասարակական կազմակերպության գրասենյակ, ծանոթացել կազմակերպության գործունեությանը, շենքային և աշխատանքային պայմաններին։
«Հայկական ճարտարապետությունն ուսումնասիրող» ՀԿ-ի ղեկավար, հուշարձանագետ Սամվել Կարապետյանը վարչապետին ներկայացրել է մի քանի տասնամյակի ընթացքում պատմական Հայաստանի տարբեր գավառներում և հայկական գաղթավայրերում կատարած գիտարշավների արդյունքում հայկական պատմական հուշարձանների վավերագրման` ուսումնասիրման, քարտեզագրման, թվայնացման ուղղությամբ կատարված, ինչպես նաև ընթացքի մեջ գտնվող աշխատանքներն ու առաջիկա ծրագրերը։
Արժևորելով «Հայկական ճարտարապետությունն ուսումնասիրող» հասարակական կազմակերպության և նրա ղեկավար Սամվել Կարապետյանի հայանպաստ գործունեությունը, նշելով իրականացված աշխատանքների գիտական բարձր մակարդակը, վարչապետ Տիգրան Սարգսյանը կարևորել է նաև կազմակերպությանը պետական աջակցություն ցուցաբերելու անհրաժեշտությունը` պատմական Հայաստանի ամբողջ տարածքում հայկական ճարտարապետության արժեքների ուսումնասիրության գործը նույն հաջողությամբ շարունակելու և զարգացնելու համար։
