երեքշաբթի, 3 փետրվարի 2009
ՀՀ վարչապետ Տիգրան Սարգսյանն այսօր ընդունել է «Ֆրանս Տելեկոմ (Օրանժ Արմենիա)» ընկերության գլխավոր տնօրեն Բրունո Դյութուային։ Հանդիպմանը մասնակցել են նաև ՀՀ-ում Ֆրանսիայի արտակարգ և լիազոր դեսպան Սերժ Սմեսովը, «Գրանդ Թորնթոն Ամիօ» ընկերության տնօրեն-բաժնետեր Արման Փինարբասին։
Ողջունելով «Ֆրանս Տելեկոմ»-ի մուտքը Հայաստան, վարչապետը նշել է, որ մեր երկրում վաղուց էր հասունացել հեռահաղորդակցման ոլորտում ևս մեկ լուրջ ընկերության գործունեության անհրաժեշտությունը։
Պարոն Բրունո Դյութուան շնորհակալություն է հայտնել ՀՀ վարչապետին և կառավարությանը` միջազգային չափանիշներին համապատասխան մրցույթ անցկացնելու, ինչպես նաև Հայաստանում գործարարության համար գործունեության բարենպաստ պայմանների ապահովման համար։ Ներկայացնելով հեռահաղորդակցման բնագավառում աշխարհի առաջատար օպերատորներից մեկը համարվող «Ֆրանս Տելեկոմի» գործունեությունը, պարոն Դյութուան նշել է, որ «Օրանժ Արմենիան» դեռևս ձևավորման փուլում է և մտադիր է նախապատրաստական աշխատանքներն ավարտել մինչև տարեվերջ ու այդ ժամկետում սկսել գործունեությունը։ Նա տեղեկացրել է, որ 2009թ. ընթացքում ընկերությունը նախատեսում է ևս 70 մլն ԱՄՆ դոլարի լրացուցիչ ներդրումներ կատարել, նպատակ ունենալով գործունեություն ծավալել ոչ միայն մայրաքաղաքում, այլև հանրապետության մարզերում` ընդգրկելով ազգաբնակչության հնարավորինս լայն շրջանակներ։
Վարչապետ Տիգրան Սարգսյանը «Ֆրանս Տելեկոմի» մուտքը հայաստանյան շուկա կարևորել է մի քանի տեսանկյունից։ Ըստ նրա, նախ ավելանում է մրցակցությունը հեռահաղորդակցման ոլորտում, որի արդյունքում շահելու են սպառողները, ինչը նաև նշանակում է նոր ներդրումներ ու նոր աշխատատեղեր։ Այդ հանգամանքը կառավարության ղեկավարի խոսքով, առավել կարևոր է ներկայիս համաշխարհային ֆինանսական և տնտեսական ճգնաժամի պայմաններում։ Տիգրան Սարգսյանի համոզմամբ, «Օրանժ Արմենիան» իր հետ Հայաստան է բերելու նոր բիզնես մշակույթ։ Ըստ կառավարության ղեկավարի, ընկերության գործունեությունը, այդ ամենի արդյունքում, կնպաստի նաև հայ-ֆրանսիական բարեկամական հարաբերությունների հետագա զարգացմանը։
Հանդիպման ավարտին ՀՀ վարչապետը հաջողություն է մաղթել «Ֆրանս Տելեկոմ (Օրանժ Արմենիա)» ընկերությանը` մեր երկրում նրա գործունեության մեջ։
