ուրբաթ, 19 հունվարի 2001
Այսօր ՀՀ վարչապետ Անդրանիկ Մարգարյանի մոտ հրավիրված խորհրդակցությանը քննարկվել են կոռուպցիայի դեմ պայքարի ծրագրի մշակմանն ուղղված կազմակերպչական խնդիրներ: Այն նպատակ ունի արագացնել և արդյունավետ դարձնել ծրագրի մշակման ընթացքը:
Որոշվել է ծրագրի նախագծի մշակումն իրականացնելու, աշխատանքները համակարգելու և հնարավորինս կարճ ժամկետում այն ավարտելու համար ստեղծել հանձնաժողով՝ ՀՀ վարչապետ Անդրանիկ Մարգարյանի գլխավորությամբ, հստակեցվել է հանձնաժողովի կազմը:
Խորհրդակցության մասնակիցները կարևորել են ծրագրի մշակման աշխատանքներին հանրապետության մտավորականության, գիտական շրջանակների, հասարակական կազակերպությունների, նաև միջազգային համապատասխան կառույցների և փորձագետների ակտիվ մասնակցությունը:
Նկատի ունենալով խնդրի համապետական նշանակությունը, կարևորվել է այս գործում կառավարության և ԱԺ-ի փոխգործակցությունը: Նշվել է, որ հանձնաժողովի համակարգմամբ կգործեն առանձին աշխատանքնային խմբեր, որոնք, ելնելով հանձնաժողովի առաջադրած խնդիրներից և որոշումներից, կիրականացնեն ծրագրի նախագծի գործնական մշակումը:
Ի դեպ, կոռուպցիայի դեմ պայքարի պետական ծրագրի մշակումը ներառված էր 2000 թ. ՀՀ կառավարության գործունեության ծրագրի կատարումն ապահովող միջոցառումների ցանկում, որի ուղղությամբ հատկապես օրենսդրական դաշտում անցած տարի որոշակի աշխատանքներ կատարվել են:
