հինգշաբթի, 26 փետրվարի 2009
ՀՀ վարչապետ Տիգրան Սարգսյանը փետրվարի 27-ին մեկօրյա աշխատանքային այցով կմեկնի Ռուսաստանի Դաշնության մայրաքաղաք Մոսկվա։ ՀՀ վարչապետի գլխավորած պատվիրակության կազմում են ՀՀ ֆինանսների նախարար Տիգրան Դավթյանը, ՀՀ էներգետիկայի և բնական պաշարների նախարար Արմեն Մովսիսյանը, ՀՀ տրանսպորտի և կապի նախարար Գուրգեն Սարգսյանը, ՀՀ արտաքին գործերի նախարարի տեղակալ Շավարշ Քոչարյանը, ՀՀ կառավարության աշխատակազմի ղեկավար Դավիթ Սարգսյանը,ՀՀ կենտրոնական բանկի ներկայացուցիչը, ՀՀ կառավարության և ՀՀ արտաքին գործերի նախարարության աշխատակազմերի պաշտոնատար այլ անձինք։
Աշխատանքային այցի ընթացքում ՀՀ վարչապետ Տիգրան Սարգսյանը հանդիպումներ կունենա ՌԴ կառավարության նախագահ Վլադիմիր Պուտինի, ՌԴ տրանսպորտի նախարար, Տնտեսական համագործակցության հարցերով հայ-ռուսական միջկառավարական հանձնաժողովի համանախագահ Իգոր Լևիտինի, Ռուսաստանի կենտրոնական բանկի նախագահ Սերգեյ Իգնատևի, գործարար շրջանակների ներկայացուցիչների հետ։ Տիգրան Սարգսյանը կայցելի նաև ՌԴ-ում Հայաստանի Հանրապետության դեսպանատուն։
Հանդիպումների ընթացքում կքննարկվեն միջկառավարական հանձնաժողովի 10-րդ` հոբելյանական նիստում անցած տարվա հոկտեմբերին կայացված որոշումների, ձեռք բերված պայմանավորվածությունների կատարման ընթացքը, երկկողմ առևտրատնտեսական կապերն ավելի ամրապնդելու և փոխշահավետ ու հեռանկարային մի շարք ոլորտներում համագործակցությունն ընդլայնելու և այլ հարցեր։
